नेवा: अनलाइन न्युज – ललेन्द्र शाक्य | नेपाल संवत ११४५ कछलाथ्व नवमी (२०८१ कार्तिक २५ गते) आइतवाः

नेवाः वस्ती नेवाः स्कूल अभियानया ग्वसालय् येँ महानगरपालिका २७ वडाव्यापी खुगू ब्वनेकुथिइ नेपालभाषा विषय कयाः ब्वनाच्वंपिं ब्वमिपिन्त मचा सिरपाः लःल्हाःगु दु ।

शुक्रवाः येँया अन्नपूर्ण माध्यमिक विद्यालय कुनाय् त्वालय् च्वंगु ब्वनेकुथिइ छगू ज्याझ्वः यासें थथे सिरपाः लःल्हाःगु खः ।

येँया २७ वडा दुनेया अल्वर्ट आइन्स्टाइन एकेदेमि, अन्नपूर्ण उच्च माध्यमिक विद्यालय, त्यौड माध्यमिक विद्यालय, भानुभक्त माध्यमिक विद्यालय (दरबार स्कूल) व महाँकाल माध्यमिक विद्यालयया छगू तगिंनिसें च्यागू तगिंतक ब्वनाच्वंपिं च्याम्ह च्याम्ह ब्वमिपिन्त सिरपाः लःल्हाःगु खः ।

अथेहे, संस्कृति माध्यमिक विद्यालयया खुगू तगिं ब्वनाच्वंपिं स्वम्ह ब्वमिपिन्त सिरपाः लःल्हाःगु खः ।

येँ २७ वडाया वडाध्यक्ष योगेश खड्गीया मूपाहाँसुइ जूगु उगु ज्याझ्वलय् मचा सिरपाःया आर्थिक कवःया कजि सुनिल कुमार शाक्य, सिरपाः कोषया दातापिं जापनीज नागरिक मासाहिरो यामाकावा (ब्याँचा दाई), डा. विजय सैंजु, कुमुद श्रेष्ठलिसें थीथी व्यक्तिपिन्सं ब्वमिपिन्त हनापौ, थीथी गिफ्ट ह्याम्पर व नगद न्याद्वः तका सिरपाः लःल्हाःगु खः ।

ज्याझ्वलय् मचा सिरपाः ज्याझ्वःयात कयाः नेवाः वस्ती नेवाः स्कूल अभियानया कजि लिसें मचा सिरपाः ज्याझ्वःया कजि दिपक तुलाधरं नुगःखँ तयादीगु खःसा अथेहे मचा सिरपाः ज्याझ्वः मेमेगु वडाय् नं न्ह्याकेगु विचाःयात कयाः येँ १८ वडाया वडाध्यक्ष न्हुच्छेकाजी महर्जनं खँ तयादीगु खः ।

ज्याझ्वलय् ब्वति काःपिं सकसित मचा सिरपाः आर्थिक कवःया कजि सुनिल कुमार शाक्यं सुभाय् देछानादीगु खःसा अथेहे, थुगु ज्याझ्वः ताःलाक्क न्ह्याकेगु नितिं ग्वाहालि यानादीपिं सकलसित खादा न्ययेकाः सुभाय् देछाःगु खः ।

ज्याझ्वलय् नेवाः न्ह्यलुवा मल्ल के सुन्दरलिसें भाषाख्यःया व्यक्तिपिं व थीथी ब्वनेकुथिया प्रिन्सिपललिसें शिक्षक शिक्षिकापिनिगु उपस्थित दूगु खः ।

Categorized in नेवाः