नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व गुरुपुन्ही (२०८१ श्रावण ६ गते) आइतवाः

येँ महानगरपालिकाया २२ वडा ज्याकुथिं न्हूसतकया सतकं हे सेवा संचालन याःगु दु ।

महानगरपालिकां फुटपाथ विस्तार यायेत सतक म्हुइधुंकाः उकिया विरोधय् क्वाहाँवःपिं वडाया जनप्रतिनिधिपिन्सं सतकय् हे पाल तयाः कामकाज ज्या न्ह्याकूगु खः । येँ २२ वडाया वडा दुजः चन्द्रमान तुलाधरं महानगरपािलकां जबरजस्ती फुटपाथ विस्तार यायेत्यनेधुंकाः वडा ज्याकुथि हे सतकं संचालन यानागु धाःगु दु ।

वडा दुजः तुलाधरं धाःगु दु, “संकटा देगःलिक्क च्वंगु वडा ज्याकुथि आः वहे सतकपाखें संचालन जुइ, सिफारिसनिसें मेमेगु फुक्क ज्या थनं हे न्ह्याकागु दु ।”

तुलाधरं न्हूसतकया फुटपाथ विवाद जुतले वडाया सेवा सतकं हे संचालन जुइगु धाःगु दु ।

येँ महानगरपालिकां बजेटय् हे तःगु न्हूसतक फुटपाथ विस्तारय् २२ वडाया वडाध्यक्ष चिनीकाजी महर्जनलिसें स्थानीयं विरोध यानाः वयाच्वंगु दु।

Categorized in स्थानिय-समाज