नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व एकादशी (२०८१ श्रावण २ गते) बुधवाः

येँ महानगरपालिकाया मेयर बालेन शाह नं स्थानीयबासी व सम्बन्धित वडाध्यक्षपिंनाप सल्लाह हे मयाःसे कानूनया बलय् हाकनं न्हूसतकया लँ चीब्या यायेगु ज्या न्ह्याकूगु द्वपं २२ वडाया वडाध्यक्ष चिनकाजी महर्जनं बियादीगु दु ।

वडाध्यक्ष महर्जनं नगर परिषदया बैठकय् मेयर बालेनं न्हूसतकया लँ दयेकेगु ज्या सहमति कथं यायेगु व राष्ट्रिय अन्तर्राष्ट्रिय मापदण्डकथं ज्या यायेगु लिसें अदालतं न्ह्याग्गु कथं फैसला याःसां नगर परिषदया दुजःपिंनाप सल्लाह यानाः यायेगुसहमति जूगु खःसां थौं हाकनं थथे जूगु सहमतियात त्वाःथलाः ज्या याःगु द्वपं नं बियादीगु दु ।

कानूनी रुपं न्ह्याग्गु कथं जूसां नं थुकियात त्याःबू कथं मकाःसे स्थानीय जनता व नगर परिषदया दुजःपिंनाप सहलह ब्याकाः ज्या याःगु जूसा बांलाइगु विचाः नं वडाध्यक्ष महर्जनं कनादीगु दु ।

नेवाः अनलाइनन्यूजलिसे खँ ल्हासें वडाध्यक्ष महर्जनं नगर परिषदया दुजःपिं विकास विरोधी मखुसे विकासवादी जूगु तर मेयर बालेनं थः यत्थे नगर परिषद दुजःपिन्त अपमानित यायेगु ढंगं ज्याखँ यायेगु यानाच्वंगुलिं न्हूसतकया पेटी तब्या यायेगु विवाद तब्या जुयावंगु खँ नं कनादीगु दु ।

वय्कलं २४ वडा अन्तर्गत लाःगु जुद्ध शालिकं वंघःतकया लँ चीब्या यानाः पेटी तब्या यायेगु ज्याय् वडाध्यक्ष व स्थानीय न्ह्यलुवाःपिंनाप सहलह ब्याकू मब्याकू थःपिन्सं मस्यूगु तर थःगु वडा २२ वडा अन्तर्गत लाःगु न्हूसतकया लागाय् पेटी तब्या यायेगु नितिं लँ चीब्या यायेगु ज्याय् वडानाप सहलह ब्याकाः जक यायेमाःगु पक्षय् थःपिं आः नं दूगु खँ कनादिसें वडा अन्तर्गत याइगु न्ह्याग्गु कथंया विकास निर्माणया ज्याखय् वडानाप सल्लाह यानाः जक यायेमाःगु विचाः नं तयादीगु दु ।

२२ वडा अन्तर्गत न्हूसतक ध्वाखानिसें पूर्व स्वयाच्वंगु जुद्ध शालिकतक लाः ।

Categorized in स्थानिय-समाज