आन्दोलनरत् ट्यांकर चालक व सरकारदथुइ सहमति, येँय् चिकं आपूर्ति न्ह्यात
नेवा: अनलाइन न्युज – ललेन्द्र शाक्य | नेपाल संवत ११४४ तछलाथ्व एकादसी (२०८१ असार ३ गते) सोमवाः
सरकार व आन्दोलनरत् ट्यांकर चालकदथुइ सहमति जूगु दु । थ्व लिसें चिकं आपूर्ति नं न्ह्याःगु दु ।
सिंहदरबारय् च्वंगु उद्योग, वाणिज्य व आपूर्ति मन्त्रालयस जूगु सहलहस चालकपिं पेट्रोलियम पदार्थया ढुवानी यायेत सहमत जूगु खः ।
थीथी न्हयगू बुँदे माग तसें ट्यांकर चालकपिं आन्दोलनय् क्वाहाँ वःगु खः । चालकपिं आन्दोलनय् क्वाहाँवयेधुंकाः पेट्रोलियम पदार्थया ढुवानीइ समस्या जूगु खः ।
चालकपिन्सं चालक व सहचालकयात श्रम ऐन कथं नियुक्ति पौ बियाः सरकारं क्वःछ्यूगु कथंया तलब कायेदयेमाःगु माग तःगु खः । दोब्बर बैंक ग्यारेन्टी व वार्षिक नवीकरण खारेज यायेमाःगु , सामाजिक सुरक्षा कोषय् आबद्धता याकेमाःगु , जोखिम भत्ताया व्यवस्था यायेमाःगु लिसेंया माग इमिसं तःगु खः ।
Categorized in बजाः