येँया पेट्राृल पम्पय् लाइन
नेवा: अनलाइन न्युज – ललेन्द्र शाक्य | नेपाल संवत ११४४ तछलाथ्व एकादसी (२०८१ असार ३ गते) सोमवाः
पेट्रोलियम पदार्थया अभाव जुइधुंकाः स्वनिगःया पेट्रोल पम्पय् सवारी चालकपिनिगु ताःहाकःगु लाइन जूगु दु ।
येँया पेट्रोल पम्पय् ताःई लिपा सवारी साधनया लाइन खनेदूगु खः ।
भारतं नेपालय् याःगु नाकाबन्दीया इलय् व वधुंकाः २०७८ सालय् पेट्रोलियम पदार्थ ढुवानी व्यवसायीपिनिगु आन्दोलनया हुनिं नं इन्धन अभाव जूगु खः ।
आः नेपाल पेट्रोलियम ट्यांकर चालक संघया आन्दोलनया हुनिं आइतवाःनिसें हे राजधानीया नीजि पेट्रोल पम्पतसें पेट्रोलियम पदार्थया विक्री ठप्प याःगु दु ।
नेपाल आयल निगमया प्रवक्ता मनोज ठाकुरं पेट्रोलियम मजदुरपिन्सं थीथी माग तयाः आपूर्ति ठप्प याःबलय् पम्पय् इन्धन अभाव जूगु खः ।
आपालं नीजि पम्य् “पेट्रोल मदु” च्वयातःगु सुचं तिकातःगु दु । चालाच्वंगु छुं छुं पेट्रोल पम्पय् धाःसा ताःई लिपा पाः वइगु वाध्यता जूगु दु ।
तांन्वःगु इलय् ताःईतक लाइनय् च्वनेमाःबलय् सवारी चालकपिं हैरान जूगु दु ।
पेट्रोलियम मजदुरपिन्सं फुक्क ट्यांकर चालक÷सहचालकया श्रम ऐन कथं नियुक्ति पौ बियाः नेपाल सरकारं क्वःछ्यूगु कथं तलबया व्यवस्था यायेत माग याःगु दु ।
स्वरोजगारया हकय् जक लागू याःगु दोब्बर बैंक ग्यारेन्टी व वार्षिक नवीकरण खारेज यायेत व चालक व सहचालकयात जोखिम भत्ताया व्यवस्था यायेमाःगु माग तकं इमिसं तःगु दु ।
Categorized in बजाः