नेवा: अनलाइन न्युज – विजयरत्न | नेपाल संवत ११४४ कौलागा अमाई (२०८१ कार्तिक १६ गते) शुक्रवाः

नेपालभाषाया म्ये संकिपा ख्यलय् बिस्कं म्हसिका दयेकेधुंकुम्ह बिश्वास बज्राचार्यया परिकल्पना व निर्देशनय् पिदंगु चिहा संकिपा “नखत्या” दक्षिण कोरियाय् जूगु सिउल इन्टरनेशनल किड्स एण्ड युथ फिल्म फेस्टिभलय् छगू सिरपाः त्याकेत ताःलाःगु दु ।

थ्व संकिपा पुचलं जानकारी बिउकथं उगु फिल्मं सिउलय् सिल्भर लाइट प्राइज त्याकेत ताःलाःगु खः । थथे थःगु सकल टिमया कुतलं तयार जूगु संकिपापाखें सिरपाः त्याकेत ताःलाःगुयात सकल टिमया नापनापं नेपाःया संकिपा ख्यःया हे न्हाय् धस्वाःगु कथं कयाच्वना धकाः थुकिया निर्देशक व परिकल्पनाकार बिश्वास बज्राचार्यं धयादिल ।

थ्व “नखत्या” संकिपा ज्योति म्युजिकया अफिसियल युट्युब च्यानलय् तयातःगु दु । थुके रवि डंगोल, अर्णेश्वरी शिल्पकार, विशम राज शाक्य, इभेन्जिला तुलाधर, निकि बज्राचार्य, सरिता शिल्पकार, रबिना तुलाधर, सिताराम माकः लगायतया कलाकारपिन्सं अभिनय यानातःगु  दुसा थ्व संकिपाया किपालुमि आकृष्ट शाक्य खःसा छ्याय् फ्वाय् कःमि बिजनराज बज्राचार्य खः ।

Categorized in कला