नेपालभाषा ख्यलय् न्हापांगु ज्याझ्वः मिसेस नेवाः धेंधेंबल्ला कासाय् न्हाप जुइत ताःलाःम्ह रेजिना शाक्य यलया न्ह्यःखा कःनिबहालय् च्वंम्ह खःसा थौंकन्हय् वय्कः मंगलबजारय् च्वना च्वनादीगु दु । वय्कःया थःछेँ ख्वपया बंशगोपाल खः । वंगु शुक्रवाः जूगु मिसेस नेवाः धेंधेंबल्ला कासाय् न्हापांम्ह मिसेस नेवाः जुइत ताःलाःम्ह मय्जु रेजिना शाक्यलिसे नेवाः अनलाइन न्यूजं याःगु बःचा हाकःगु खँल्हाबल्हा न्ह्यब्वयाच्वना । –संं.)

• न्हापांम्ह मिसेस नेवाः जुयादी धुंकाः गुज्वःगु अनुभव यानादिया ?

नेवाःतय्गु खँ यक्व सयेका । नेवाः भाय्, नेवाः संस्कृति अथेहे नेवाःतय्गु नितिं यायेमाःगु ज्याखँयात कयाः निर्णायक मण्डलय् च्वनादीपिं दाजुपिं प्रेमलाल महर्जन, दिपक तुलाधर अथेहे ग्वसाः खलःया प्रमुख रेणुका बज्राचार्यपिं पाखें यक्व खँ सयेकाः । थुगु ज्याझ्वलय् ब्वति कयाः न्हूकथंया हे अनुभव जूगु दु ।

• छि छु लजगाः यानादी ?

लजगाः कथं जि यल महानगरपालिका ६ वडाया कर्मचारी खः । उगु वडाय् जिं नागरिक सचेत केन्द्रय् ज्या यानाच्वनागु दु । सामाजिक ज्याखँ यायेगु कथंया गतिविधिइ जि आबद्ध जुयाच्वनागु दु ।

• मिसेस नेवाः ज्याझ्वलय् ब्वति कायेत गनं छितः बिचाः वल ?

न्हापांनिसें हे जितः थुगु कासाय् ब्वति कायेतं मं दूगु खः । उकिसनं जिगु छेँपाखें थुकथंया ज्याझ्वलय् ब्वति कायेत हःपाः ब्यूगुलिं नं जिं थुगु ज्याझ्वलय् ब्वति कयागु खः ।

• छिगु छेँजःया सम्बन्धय् छुं धयादी ला थें ?

जिगु श्रीमान व्यवसायिक क्षेत्रय् आबद्ध जुयाच्वनादीगु दु । जि खुदँ दुम्ह छम्ह काय् दु ।

• छिगु मेमेगु शोख छु दु थें ?

न्हापांनिसें जितः हुलाप्याखंया शोख दु । कलेजया इलय् नं थीथी ज्याझ्वलय् ब्वति कयाः हुलाप्याखं हुलेगुलि ब्वति कया । आः नं जि एक्सरसाइज कथं जुम्बा याना । जितः जुम्बाय् तसकं शोख दु । न्हापा लिपा नं जिं योगा याना ।

• मिसेस नेवाः जुइधुंकाः आः छिगु न्हूगु छु योजना दु ?

कलेजं निसें जिगु इच्छा धैगु समाजसेवा हे खः । जि म्यानेजमेन्टया विद्यार्थी जूगु नातां नं जिगु इच्छा धैगु नागरिक सचेत केन्द्रय् च्वनाः समाजसेवा यायेगु हे खः ।