नेवा: अनलाइन न्युज | २०८० भाद्र ८, शुक्रबार १४:३८:५०

नक्कली काय् जुयाः सम्पत्ति नःम्ह सतराज पुर्पक्षया नितिं थुनाय्

दिवंगत जुइधुंकूम्ह मिसाया नक्कली काय् जुयाः किर्ते भ्वँ दयेकाः जग्गा नःगु अभियोगय् गिरफ्तारीइ लाःम्ह सतराज गुरुङयात अदालतं पुर्पक्षया नितिं थुनाय् छ्वःगु दु ।

येँ जिल्ला अदालतया न्यायाधीश फणिन्द्रप्रसाद पराजुलीया इजलासं गुरुङयात पुर्पक्षया नितिं थुनाय् छ्वयेगु आदेश ब्यूगु खः ।

मकवानपुर छेँ जुयाः येँया कपनय् च्वनाः वयाच्वंम्ह गुरुङं स्याङ्जाया उमादेवी गुरुङया नामय् येँया किपुली दूगु ९९२ वर्गमिटर जग्गा उमादेवीया नक्कली काय् जुयाः थःगु नामय् याःगु खः ।

स्याङ्जाया मेथाभुरुङय् जन्म जूम्ह गुरुङया २०७४ भाद्र २६ गते हे मृत्यु जूगु खः । वया भाःत एमसी परेरां छुं दँ लिपा २०७७ साउन ८ गते कलंकी मालपोत ज्याकुथिइ उमादेवीया नामय् दूगु कीर्तिपुर नगरपालिका १० वडाय् दुने लाःगु जग्गा थःगु नामय् नामसारी यायेत निवेदन बिल । कलंकी मालपोतय् २०७८ मंसीर १४ गते हाकनं नामसारी यानाः जग्गाधनी पूर्जाया नितिं निवेदन बिल । वहे दिं नामसारी मिसिल खडा यानाः जग्गा श्रेस्ताय् तकं जनाउ यात । जग्गा छु गुज्वःगु स्थितिइ दु धकाः वंगु जेठ ७ गते कलंकी मालपोतय् बुझेयायेत वंबलय्उमादेवीया नक्कली काय् जुयाः सतराज गुरुङंनामसारी यायेधुंकूगु सीकल ।

सरकारी, सार्वजनिक लिखत किर्ते याःगु अभियोगय् नक्कली काय् जुयाः जग्गा थःगु नामय् याःम्ह सतराज गुरुङ, कलंकी व मकवानपुरया सिखरबोट मालपोट ज्याकुथिया कर्मचारीपिं, मकवानपुर व थाहा नगरपालिका १२, कीर्तिपुर नगरपालिका १० वडाया जनप्रतिनिधिपिं व स्थलगत सर्जमिन मुचुल्का च्वंपिंविरुद्ध उमादेवीया भाःत परेरां ‘संगठित रुपं सम्पत्तिया आपराधिक उपयोग व लिखतसम्बन्धी कसुर’य् प्रहरीइ उजुरी बिल । उजुरीलिपा वंगु असार ३ गते उमादेवीया नक्कली काय् जुयाः जग्गा नःम्ह सतराजयात प्रहरीं गिरफ्तार याःगु खः ।

अनुसन्धानया झ्वलय् कलंकी मालपोतया अधिकृत कृष्णप्रसाद गौतम, नायब सुब्बापिं गेहेन्द्रराज तिम्सिना, गुरुप्रसाद घिमिरे, ईश्वर ढुंगाना व खरिदार पूर्णराज बरालं धाःसा उमादेवीया भाःत परेरां कलंकी मालपोतय् ब्यूगु निवेदन ज्याकुथिइ खोजतलास यानाबलय् लुयाः मवःगु व फुक्क वडा व सरकारी ज्याकुथिपाखें वःगु भ्वँ, सर्जमिन मुचुल्का, नाता प्रमाणपत्र, मृत्यु दर्ता लिसेंया भ्वँपाखें उमादेवीया काय् सतराज गुरुङ सीदूगुलिं जग्गा नामसारी यानाबियागु धकाः बयान ब्यूगु दु ।

‘निज प्रतिवादी सतराज गुरुङया मां मदुम्ह उमादेवी गुरुङ हे खः वा मखु, उकिया सम्बन्धय् जिमिसं मस्यू’ धकाः इमिसं बयानय् धाःगु दु खँ जिल्ला सरकारी वकिल ज्याकुथि येँपाखें साउन २८ गते तयार याःगु अभियोग पत्रय् न्ह्यथनातःगु दु ।

जग्गा नयेत थःथिति हे सक्रिय

जिल्ला सरकारी वकिल ज्याकुथि येँपाखें सतराज गुरुङलिसें मकवानपुरया थाहा नगरपालिका १२ या तत्कालीन वडाध्यक्ष टीकाराम स्याङतान व स्थानीयपिं सानुकान्छा स्याङतान, माइली स्याङतान, श्याम गोले, बमबहादुर गुरुङ, राजु गुरुङ, चन्द्रकुमार मुक्तान, ओबजंगबहादुर रोकाया, रामशरण गुरुङ, कृष्णबहादुर गुरुङ, सुकुमान स्याङतान, रामबहादुर स्याङतान, नरेश घलान, मालपोत ज्याकुथि सिखरबोट मकवानपुरया खरिदार सुदीप ढकाल लिसें कीर्तिपुर नगरपालिका १० वडाया वडाध्यक्ष नरेश महर्जन नापनापं किपूया पिं रुपेश श्रेष्ठ, देवचन्द्र महर्जन, विनोद मानन्धर, संजयरत्न बज्राचार्य, तीर्थकुमार प्रधान यानाः २१ म्हविरुद्ध ‘संगठित रुपं सम्पत्तिया आपराधिक उपयोग व लिखत सम्बन्धी कसुर’या अभियोग तःगु दु ।

कान्तिपुरपाखें

Categorized in पत्रपत्रिका