(रविन्द्र शाही, थौंकन्हय् संकिपा ख्यःया छम्ह लोकं ह्वाह्वां वयाच्वनादीम्ह संकिपा निर्देशक खः । वय्कः मध्यपुर थिमिया हातिमहाकांलय् जन्म जुयादीगु खः । वय्कलं दकले न्हापां ‘ध्यबाया शक्ति’ दबू प्याखनं थःगु कलायात्रा न्ह्याकादीगु खः । वय्कलं छ्यूगु कलायात्रा थौं वयाः नीन्यादँ थ्यंगु दु । थ्वहे नीन्यादँ थ्यंगु लसताय् वय्कलं छगू तःजिगु ज्याझ्वःया ग्वसाः ग्वयादीगु दु असोज ६ गते शुक्रवाः । थ्वहे विषयस वय्कः रविन्द्र शाहीलिसे ललेन्द्र शाक्यं यानादीगु छझाः खँल्हाबल्हा थन बःचाहाकलं न्ह्ब्वयाच्वना । –सं.)                       

• नीन्यादँ दत छि, कलायात्राय् पलाः न्ह्याकादियागु । गुकथं न्ह्यात पलाः थुगु कला यात्राय् ?

दकले न्हापां रविन्द्र शाही छम्ह कलाकार , निर्देशक धकाः म्हसिल व नाप स्वकुमि भाजु मय्जुपिनिगु मतिना व सदभाव दया दुःखसुख छुं हे नुगलय् मतःसे नीन्यादँ कला क्षेत्रय् च्वनाः च्वनेदत ।                                                 

• संकिपा निर्देशक जुइ न्ह्यः कला ख्यलय् छिं छु छु यानादिया ?

निर्देशक जुइ न्ह्यः छम्ह कलाकार जुया हे वयाच्वनागु जुल । व नाप संकिपा ख्यलय् बाखं च्वयेगु नं याना छगू निगू संकिपाय् ।                                       

• संकिपाय् निर्देशन यायेगु विचाः गुकथं गबले ब्वलंगु खः ?

कलाकार जुयाच्वनागु इलय् कलाकारलिसें न्हापांनिसें निर्देशन यायेगु नं बिचाः यानागु हे जुल । व नापं सिइकाः थुइकाः निर्देशन नं यायेगुलि पलाः न्ह्याकागु खः ।

• आःतकया दुने ग्वःगु संकिपाय् निर्देशन यानादी धुन ? छि कलाकार जुया नं म्हितादियागु दु ला ? नेपालभाषा संकिपा बाहेक छिं खस भाषाया संकिपा नं दयेकादीगु दु । नेपालभाषा व खस भाषाया संकिपा निर्माणय् गुलि फरक दु ?

गाइजात्रा–सापारु ख्यालः प्याखनय् नं यक्व हे यायेधुन । खस भासा टेलिफिल्मय् मुख्य सहायक निर्देशक व कलाकार जुया दर्जनांै यायेधुन । नेपालभासा ‘थःम्ह म्हूगु गाः’ संकिपाय् न्हापांगुखुसि निर्देशन यानागु ख अले ‘मि. हर्कमान’ संकिपा न्हापांगु खस भासाया संकिपा ‘भ्रम’य् बाखंलिसें निर्देशन यानागु जुल । नेपालभासाया सर्टमूभिइ नं बाखं नापं निर्देशन यायेगु ह्वःताः चुलात । नेवाः व खस भासाया संकिपाय् फरक ला छुं नं मखना । फरक धायेगु खःसा बजेट, कलाकार व भासा जक हे खः । 

• नेपालभाषा संकिपा ख्यःया स्थिति थौंकन्हय् छिं गथे जुयाच्वंगु खंकादिया रु व गथे जुइमाःथें च्वं ?

आः ला संकिपा ख्यःया स्थिति न्हापा स्वयां यक्व हे बांलानाः वःगु दु । प्राविधिक नं बाबांलाःगु छ्यले दत । अझ नं बांलाकेत पासापिन्सं जस्तै वर्कसप याना नं संकिपा दयेकाः वयाच्वगु दु । थ्व बांलाःगु पक्ष व कुतः खः संकिपा ख्यलय् ।                                    

• थःगु कलायात्रा नीन्यादँ क्यंगु लसताय् छिं तःजिगु ज्याझ्वःया ग्वसाः ग्वयादीगु दु । गुकथं वल थुज्वःगु ज्याझ्वः यायेगु विचाः ?

कलायात्राया ख्यलय् आःतक सुनानं थुज्वःगु कथं २५ दँ क्यंगु लसताय् लुमंकेबहः जुइकथंया ज्या याःगु खनेमदुनि । उकिं थःम्हं थुकियात वाःचायेकाः थुकथं कलायात्राया २५ दँ क्यंगु लसताय् थुज्वःगु कथंया ज्या यायेत्यनागु खः । जिगु थुगु पलाखं कन्हय् मेपिन्सं नं नाला कयाः थुज्वःगु कथंया ज्याझ्वः यायेफयेमा धैगु मनंतुनां हे थुगु ज्याझ्वःया ग्वसाः ग्वयागु खः । लिसें जिं थुगु ज्याझ्वलय् थः गुरुपिं रत्न श्रेष्ठ व प्रभाकर देव शर्मापिन्त हनेगु नं ग्वसाः ग्वयागु दु । जितः रत्न श्रेष्ठ गुरुं दकले न्हापां ‘ध्यबाया शक्ति’ प्याखनय् म्हितकूगु खः । अले प्रभाकर देव शर्मां बि.सं. २०४९ सालनिसें थीथी विज्ञापन व टेलिप्याखं म्हितकूगु खः ।

• छिसं कला यात्राया झ्वलय् भावी योजना छु गुज्वःगु दयेकादियागु दु ?

धायेगु खःसा, कला यात्राया झ्वलय् जिं संकिपा निर्माण यानाः संकिपापाखें समाजय् जनचेतनालिसें विकृति विसंगतित न्हंकेगु कुतः हे जिगु प्राथमिकता खः । न्हापा सुरु सुरुइ नेवाः संकिपात पिदन, सकलसिगु नुगलय् नेवाः संकिपा नं दु धैगु मन क्वसायेकाः स्वयेगु यात । उबले प्राविधिक पक्ष कमजोर जूगु हुनिं स्तरीय प्रविधि छ्यले मफूगु खः । आः वयाः झीसं स्तरीय प्रविधि छ्यलाः स्तरीय संकिपा स्वकुमिपिनिगु न्ह्यःने न्ह्यब्वयेगु कुतः यायां पलाः छिना वनेगु जुइ ।

• नीन्यादँया कला यात्राय् छिं दर्शकपिन्त छु बियागु दुथें च्व ? उपलब्धि छु छु जुल ?

नीन्यादँया कला यात्राय् जिं दर्शकपिन्त संकिपाया माध्यमं थःगु भाषा, कला, संस्कृति ल्यंकातयेमाः धैगु ध्वाथुइके फूगुथें तायेका । थ्व क्रम निरन्तर न्ह्यानाच्वनी । स्वकुमिपिनिगु माया मतिना कायेखंगु हे जिगु नितिं तःधंगु उपलब्धि खःसा वहे उपलब्धिं यानाः मद्दिक्क नीन्यादँ न्ह्यःनिसें थुगु ख्यलय् पलाः न्ह्याकाच्वनेफूगु खः ।

• दकले लिपा छुं धयादी कि ?

नेपालभाषाया संकिपायात थःगु संकिपा भाःपिया हल थ्यंक वना स्वयेगु कुतः यानादिसँ । झीगु संकिपा नं थौंकन्हय् प्रविधियुक्त स्तरीय कथं निर्माण जुयाच्वंगु दु । झीगु संकिपा झीसं हे मस्वःसा सुनां स्वइ, उकिं संकिपा स्वयादिसँ धकाः इनाप याये । अले जितः पासापिन्सं हःपाः बिया थन तक थ्यकेफत, सकल पासापिन्त सुभाय् बियाच्वना ।