येँयाः जात्राया निंतिं सकतां कथंया तयारी पूवन ।  कन्हय् यःसिँ थनेवं येँयाः जात्रा विधिवत रूपं न्ह्याइ ।  जात्राया न्हापांगु दिं फुक्क हे जात्रा नाप आवद्ध द्यःपिं पिहां बिज्याइ ।  येँयाःया इलय् जात्रायात कयाः फुक्क कथंया चर्चापरिचर्चा जूसां जात्राया न्हापांगु न्हि कन्हय् कुमारीपूजा याइगु चर्चा अपाय्सकं जुइगु मयाः । गुथि संस्थानं येँयाः जात्रा तःजिक न्यायेकेया निंतिं परम्परागत व ऐतिहासिक रूपं निन्हु न्ह्यः हे कुमारी छेँय् द्यःपिनि निंतिं मरिचरि छुइगु ज्या याइ । कन्हय् बहनी गणेद्यः व भैलःद्यः कुमारी छेँय् बिज्याइ । कुमारी माजुया लिसें वय्कःपिंत मरिचरि छायेधुंकाः कुमारी छेँनं स्वम्हं द्यःपिं लाय्कूदुने जात्रा यानाः बिज्याकी । थ्व लिपा तलेजु भवानीया आचाःजुपिंसं तःजिक पूजाआजा याइ ।
येँयाः जात्राया विशेषतायात कयाः राष्ट्रपतिनिसें राज्यया प्रमुख अंगय् च्वंपिंत व्यवस्थापनपाखें माःकथंया जानकारी बीधुंकूगु दु । जात्रा तःजिक क्वचायेकेया निंतिं मू खँ ला तःभुखाय् लिपा दुनेया सहरय् तू तयातःगु न्हापा गथे खः अथे हे दनि । तर न्हापा नं व्यवस्थित रूपं हे द्यः सालेगु ज्या जूगुलिइ थुगुसी नं उकथं हे द्यः सालेगु तयारी जुयाच्वंगु दु । द्यः सालेगु ई न्हापाया दँय् ३ ताः इलय् यानागु खःसा थ्व दँय् नं अथेहे न्हापां द्यः सालेगु ग्वसाः ग्वयाच्वनागु दु ।

इन्द्रजात्रा व्यवस्थापन समितिं न्हापा लिपा गथे व्यवस्थापन यानागु खः उकथं हे रेडक्रस, स्वयंसेवकया निंतिं स्काउट अले जात्राया न्हापांगु न्हि राष्ट्रपति झाइगु इलय् लाखे, पुलुकिसि व सवःभक्कुया ग्वाहालिमिपिं कुमारी छेँ क्वय् दुहां वये मखन धकाः यानाच्वंगु समस्यायात नं थुगुसी निसें समाधान याये कथं लाखे, पुलुकिसि व सवःभक्कुया ग्वाहालिमिपिंत सच्छिगू पास उपलब्ध याकागु दु ।
अथेहे, जात्राया इलय् सुरक्षा व्यवस्थायात कयाः जनसेवा प्रहरी प्रभागनाप नं मुँज्या च्वनेधुन । वय्कःपिनि पाखें माःकथंया सुरक्षा व्यवस्थ यायेगु बचं नं ब्यूगु दु ।
थुकथं जात्राया निंतिं यायेमाःगु सकतां तयारी जुइधुंकूगु जूसां नं जनस्तरपाखें नं थ्व जात्रा तःजिक हनेगु निंतिं फूचाःगु ग्वाहालि यायेमाः धयागु विचाः ज्वनाः जिमिसं वंगु आइतवाः नेपाः ब्यांक्वेटय् प्रतिनिधिमुलक भेला नं यायेधुनागु दु । कुमारी खः सालेगु जात्राया लिपांगु न्हि, नानिचायाः कुन्हु न्हापा थें हे मिस्तपाखें द्यः सायेकेगु निर्णय जूगु दुसा उकिया भाला नानीहेरा महर्जनजुयात बियागु दु ।

अथेहे, थुगु जात्राय् न्हापा न्हापा बाजं वयेगु चलन मदु । तर व्यवस्थापन समिति नीस्वनेधुंकाः बाजं खलःपाखें नं ब्वति कायेगु यानाहःगु दु । वंगु दँय् नीच्यागू–नीगुंगू बाजं खलः वःगु खःसा थुगुसी नं उकथंया हे सहभागिताया निंतिं पंचनारायण महर्जनया नेतृत्वय् बाजं समिति दयेकाः ज्या न्ह्याकागु दु ।
अथेहे, भित्री सहरदुने सरसफाइ, मत–टेलिफोनया तार चीकेया निंतिं पत्राचार यायेधुनागु दुसा जात्रा जःछि हे लोडसेडिङ चीकेया निंतिं नं पत्राचार यायेधुनागु दु ।
येँ देय्या तःधंगु येँयाः जात्रा आः वयाः येँया जक मखु नेपाःया हे तःधंगु जात्रा कथं म्हसीका बीगु जुयाच्वंगु दुसा थुलि जक मखु, येँयाः जात्रा हलिमय् नेपाःयात हे म्हसीकेगु जात्रा कथं नं स्थापित जुइधुंकूगु दु ।
(इन्द्रजात्रा व्यवस्थापन समितिया नायः लिसें कुमारी छेँया चिताइदार गौतम शाक्यलिसे जूगु खँल्हाबल्हाया लिधंसाय्– सं.)