(यल महानगरपालिका ४ वडाय् लाःगु धोबिघाटया राम खड्गी व सुर्जलक्ष्मी खड्गीया म्ह्याय् आराध्यालक्ष्मी खड्गी थौंकन्हय् यलया पूर्णचण्डीइ च्वंगु विद्या विकास बोर्डिङ्ग स्कूल व यलया हे थसिखेलय् च्वंगु बर्नबी बोर्डिङ्ग स्कूलय् नृत्य शिक्षिका जुयाः थौंकन्हय् ज्या यानाच्वनादीगु दु । लिसेलिसें नेपालभाषाया संकिपा, म्यूजिक भिडियो व स्टेज प्रोग्रामय् व्यस्त जुयाच्वनादीगु दु । डिस होम इन्टरटेन्टमेन्ट टेलिभिजनय् ज्याझ्वः न्ह्याकामिया रुपं नं ज्या यानादीधुंकूम्ह थौंकन्हय् नेवाः संकिपा ख्यःया लोकंह्वानाच्वंम्ह सेलिब्रेटी आराध्यालक्ष्मी खड्गीलिसे नेवाः अनलाइनन्यूजया सम्पादक ललेन्द्र शाक्यं यानादीगु खँल्हाबल्हाया छुं अंश न्ह्यब्वयाच्वना ।)

छिगु नां आराध्यलक्ष्मी गुकथं जुल ? सक्कली नां हे खःला थ्व ?

जिगु नागरिकता व नामाकरणया नां लक्ष्मी खड्गी खः । आराध्या नां जितः अतिकं यःगु हुनिं लिपा थःगु नां लक्ष्मी न्ह्यःने आराध्या तयागु खः ।

गुबलेनिसें अभियन क्षेत्रय् पलाः लात ?

थ्यंमथ्यं न्यादँ न्ह्यःनिसें थुगु क्षेत्रय् सक्रिय जुयाः वयाच्वनागु दु ।

अभिनय बाहेक मेगु छुं यानादी ?

अभिनय बाहेक नृत्य निर्देशन पेशाय् आबद्ध जुयाच्वनागु दु । थीथी स्कूलय् ज्याझ्वः कोर्डिनेटर जुयाः पलाः न्ह्याकाः च्वनागु दु ।

न्हापांगु संकिपा व म्यूजिक भिडियो ?

अञ्जु पन्तं हालातःगु म्ये हे जिगु न्हापांगु अभिनय दुथ्याःगु म्ये खः । संकिपापाखे न्हापांगु अभिनय यानागु संकिपा राजेशमान सिंह निर्देशित नेपालभाषाया संकिपा ‘लिबाय् धुंकाः’ खः ।

म्ये नं हालादी हँ खःला ?

जि चीधिकःचा बलय् निसें हे प्याखं ल्हुइगु व म्ये हालेगु शोख दुम्ह जूगुलिं म्ये नं हालागु दु । रेकर्डिङ्ग जुइधुंकूगु उगु म्येया म्यूजिक भिडियो नं याकनं हे पिदनेत्यंगु दु ।

आः छुकी ब्यस्त ?

आः नेपालभाषाया संकिपा ‘लिबाय् धुंकाः’ या संकिपा प्रमोशन, शर्ट मूभि, म्यूजिक भिडियो व स्टेज प्रोग्रामय् ब्यस्त जुयाः च्वनागु दु ।

जीवन व अभिनयस फरक ?

जीवन यथार्थ खःसा अभिनय जीवनया प्रतिबिम्ब अर्थात् किचः खः । अभिनय जीवनया न्हायकं खः ।

कलाकारिता क्षेत्रय् पलाः तयागु हुनि (कारण) ?

मचांनिसें प्याखनय् नुगः क्वचाः जिगु । स्कूलया ज्याझ्वलय् नर्सरी तगिंनिसें प्याखं ल्हुया । स्कूल ज्याझ्वलय् नर्सरीनिसें हे बांलाक्क प्याखं ल्हुइम्ह जूगुलिं प्याखंया नितिं सर व मीसपिन्सं जितः हे ल्यइगु खः । प्याखं ल्हुल्हुं हे कलाकारिता क्षेत्रया थौंया अवस्थाय् तक जि थ्यनेत ताःलाःगु दु ।

सुयागु प्रेरणां थ्व क्षेत्रय् लात ?

प्याखं बांलाक्क ल्हुइ धैगु भावना जागृत जूगु जुयाः बलिउडया अभिनेत्रीपिनिगु प्याखं आपालं स्वयेगु जिं व जि नं इपिंथें प्याखं ल्हुइ फु धैगु मनय् जुइगु खः । यक्व हे रिहर्सल यानाः मिहिनेत याना । उकिं प्रेरणाया स्रोत जिं स्वयं थः हे धकाः धाये ।

थौंतकया दुने गुलि संकिपा व म्यूजिक भिडियो म्हितेधुन ?

आःतक नेपालभाषाया निगू संकिपाय् म्हितेधुन । शर्ट मूभि न्यागूति म्हितेधुन । म्यूजिक भिडियो खस नेपाली, नेपालभाषाया यानाः स्वीगूति म्हितेधुन । चर्चित नेपाल टेलिभिनं प्रसारित टेलिश्रृंखला ‘सिंहदरबार’य् नं अभिनय याना ।

छितः थःम्हं अभिनय यानागु यःगु संकिपा व म्यूजिक भिडियो छु जुइ हला ?

थःम्हं म्हितागु यःगु संकिपा नेपालभाषाया संकिपा ‘लिबाय् धुंकाः’ हे खः । म्यूजिक भिडियोय् धिरेन शाक्य दाईलिसे म्हितागु ‘पिया च्वने...’ खःसा मेगु ‘ए भ्वासिम्ह भाजु...’ खः ।

थ्व ख्यलय् वयेत संघर्ष छु गुलि यायेमाल ? संघर्षया झ्वलय् छुं ल्वःमंके मफूगु क्षण दु जुइनि ?

संघर्ष, उम्म जीवन धैगु हे छगू संघर्ष खः । संघर्षं हे फुक्क प्राप्त जुइ । उकिं जि आःतक नं संघर्षरत् हे जुयाच्वनागु दु ।

मतिना छु खः ? छि मतिनाय् दु कि मदु ?

मतिना..., ततःधंगु अस्त्रं हासिल यायेमफूगु जित मतिनां अःपुक्क हे प्राप्त यायेफइ । मतिना जीवनया मूदूगु उपहार खः ।  जि मतिनाय् दु...जिगु पेशालिसे...जिगु छेँजःलिसे...मतिनाया परिभाषा थाय्, क्षेत्र, भूगोलया आधारय् हिउपाः जुइ ।

विना मतिना, अले मतिनामि विनाया जीवन गथे जुइथें ?

मिजं मिसादथुया मतिनाया बारे खँ ल्हानादीगु जुइ छिं । म्वायेत मिजं मिसादथुया मतिना जुइ हे माः धैगु मदु । विना मतिना नं जीवन न्ह्यानाच्वनी । डेफिनेट्ली, थाकूगु महसुस ला जुइ ।

सेलिब्रेटी खः आराध्या, लँपुइ जुइबलय् छु गुज्वःगु थाकू याः अःपु ?

छम्ह सेलिब्रेटीयात थुलि ला जुइगु हे जुल । सामान्य मनूसिबें पृथक जुइ । पब्लिक फिगर जुइधुंकाः सामान्य मनूयाथें जीवन जुइमखुगु जुयाच्वन ।

भविष्यया योजना ?

भविष्यया योजना छम्ह सफल कलाकार, सफल कोरियोग्राफर व सफल संकिपा निर्देशक जुइगु खः ।

छि फ्यानपिन्त छुं हसना (सन्देश) ?

कलाकारिता, कलाकार राष्ट्रया सम्पत्ति खः । माया–मतिना, हःपाः हौसला व संरक्षण बियादिसँ । सुभाय् ।