नेवा: अनलाइन न्युज – ललेन्द्र शाक्य | नेपाल संवत ११४५ कछलागा पंचमी (मंसीर ५ गते) बुधवाः

विद्युतीय कारोवार (साइबर अपराध) मुद्दाय् गिरफ्तारीइ लाःम्ह दुर्गा प्रसाईंयात थौं बुधवाः येँ जिल्ला अदालतय् पेस याःगु दु ।

मंगलवाः न्हिनय् ख्वपया कमेरोटारय् च्वंगु प्रसाईंया निजी निवासपाखें गिरफ्तारी लाःम्ह प्रसाईंयात म्याद थपया नितिं थौं बुधवाः अदालत पेस याःगु खः ।

सीआईबीं मंगलवाः प्रसाईंया स्वास्थ्य परीक्षण यानाः साइबर ब्युरोयात जिम्मा ब्यूगु खः । प्रसाईं नं प्रधानमन्त्री केपी शर्मा ओलीयात स्वानाः सामाजिक संजालपाखें अफवाह ब्वलंकूगु द्वपं दु । प्रसाईंविरुद्ध साइबर अपराधय् अनुसन्धान न्ह्यःने यंकूगु दु । प्रसाईंविरुद्ध किर्ते लिसें मेमेगु कसुरय् नं अनुसन्धान जुइगु जूगु दु ।

प्रसाईं नं कम्बोडियाय् च्वंगु टेलिकम एक्जियाटा कम्पनीइ प्रधानमन्त्री केपी शर्मा ओलीया २१ करोड अमेरिकी डलर लगानी दूगु धासें थीथी भ्वँ तयाः भिडियो सार्वजनिक याःगु खः ।

प्रसाईंयात न्हापांनिसें हे थीथी अपराधय् अनुसन्धान जुयाच्वंगु खः । विवादास्पद मेडिकल व्यवसायी दुर्गा प्रसाईं थ्वसिबें न्ह्यः असोज ६ गते गिरफ्तार याःगु खः ।

रास्वपाया छम्ह केन्द्रीय दुजः नं ब्यूगु जाहेरी कथं प्रसाईंविरुद्ध साइबर अपराधसम्बन्धी मुद्दा येँ जिल्ला अदालतय् विचाराधीन दु ।  उगु मुद्दाय् प्रसाईं १ लख तका दां धरौटी तयाः थुनापाखें पिहाँ वःगु खः ।

Categorized in दुर्घटना-अपराध