‘गड गिफ्ट हे खः जिगु सः’ –न्हूप्रतिभा गायिका सुनयना
(सुनयना गुरुङ, मां नेवाः (शाक्य) व अबु गुरुङपाखें जन्म जुयादीम्ह न्हूप्रतिभा म्येहालामि खः । सुनयनां अध्ययनया झ्वलय् थौंकन्हय् १२ तगिं क्वचायेके धुंकूगु दु । मानविकी दुने मास कम्युनिकेशन ब्वनाच्वंम्ह सुनयनां उगु मास कम्युनिकेशन विषय थाकु चायेकाः पपुलेशन विषय कया ब्वनादिल । सुनयनाया निपू स्वपू म्यूजिक भिडियो पिदने धुंकूगु दुसा उगु म्यूजिक भिडियोत यूट्यबय् नं डाउनलोड यानातःगु दु ।
न्हूप्रतिभा म्येहालामि सुनयना गुरुङं खास हे धायेगु खःसा गननं संगीतया प्रशिक्षण कयामदी । अय्सां वय्कः संगीत ख्यलय् बुलुहुँ स्यलानाः वयाच्वनादीगु दु । वय्कः सुनयना गुरुङलिसे यानागु बःचाधंगु खँल्हाबल्हा थन न्ह्यब्वयाच्वना । –सं.)
सुनयना, छिगु विचालय् संगीत धैगु छु खः ?
संगीत धैगु जिगु विचालय् छगू थःत आनन्द जुइगु माध्यम खः । गुबले थः पीडाय् लानाच्वनीगु इलय् संगीतं नुगःयात आनन्द बिइ अले उगु च्यानाच्वंगु नुगःयात शान्त यानाबी । वहे संगीत खः जिगु लागि ।
२१ औं शताब्दीइ छितः गुज्वःगु संगीत यः ?
अँ...वहे खः, थःगु नुगःयात दुनेथ्यंक थीगु संगीत यः । अले डान्सिङ प्याटनया रोमान्टिक संगीत यः जितः ।
थौंकन्हय्या दर्शकपिं गुज्वःगु कथंया संगीतय् झुमे जुइगु याः ?
खास हे धायेगु खःसा, थौंकन्हय्या अडियन्सपिं डान्सिङ प्याटन व रोमान्टिक मूडया संगीतय् डुबेजुइगु याः । जि नं थुज्वःगु कथंया संगीतय् हे झुमे जुयाच्वनागु दु । आनन्द वः जितः थुज्वःगु संगीतपाखें ।
संगीतया प्रशिक्षण गनं कयादिया ?
खास हे गननं जिं संगीतया प्रशिक्षण मकया । धायेगु खःसा जि गायिका जुयागु व जिगु सः ‘गड गिफ्ट’ हे खः धाःसां छुं मपाः ।
भविष्यया योजना छु दु ? गायिका जुइगु कि मेगु छुं ?
अँ...भविष्यया योजना थ्वहे संगीत क्षेत्र दुने गायनयात हे निरन्तरता बियावनेगु कथं पलाः न्ह्याकाच्वना । तर इच्छा ला जितः यःगु पेशा नर्सिङ्ग नं खः । ग्व, इलं गन यंकी स्वये का । गायन पेशाय् सुथांलात धाःसा थ्वयात हे जीवनया पासा नालाः वने ।
(थन क्लीक याना सुनयनाया म्यूजिक भिडियो स्वयादिसँ)
