नेवा: अनलाइन न्युज | नेपाल संवत ११४५ कछलागा दुतिया (२०८१ मंसीर २ गते) आइतवाः

नेपाःया हास्यब्यंग्य विधालय् विशिष्ट थाय् दयेकेत ताःलाःगु मह जोडी अर्थात् ख्यालिजुजु मदनकृष्ण श्रेष्ठ व हरिबंश आचार्य छगू दशकलिपा हाकनं दबुली लिहाँवःगु दु ।

“मह जात्रा” प्रहसनपाखें हाकनं दबुली लिहाँ वःगु महयात स्वयेत येँया नेपाल प्रज्ञा प्रतिष्ठान कमलादीइ स्वकुमिपिनिगु भीडभाड हे जूगु दु ।

ज्याझ्वलय् फुक्क वर्ग व समूया स्वकुमिपिनिगु उपस्थिति खनेदूगु व महया प्रस्तुतिइ दुथ्याःम्ह कलाकार किरण केसीं जानकारी ब्यूगु दु ।

हास्य कलाकार किरण केसीं धाःगु दु, “ज्याझ्वलय् स्वकुमिपिनिगु भीड आपालं खनेदत, सुनां थ्व जोडीप्रतिया स्वकुमिया माया व सम्मानयात हाकनं छक्वः न्ह्यब्वःगु दु । जिमिसं विदेशय् तकं थ्वहे शीर्षक  थुगु हे दँ ज्याझ्वः यानकागु खः । विदेशधुंकाः स्वदेशय् कायेखंगु माया अद्भूत जूगु दु ।”

थ्व ज्याझ्वःयात मह जोडीया सम्भावित लिपांगु प्रहसन कथं काःगु दु । थुकी कलाकार ख्यालिजुजु मदनकृष्ण श्रेष्ठया स्वास्थ्य चुनौतया बाबजुद हास्यव्यंग्यय् निरन्तरता बिइगु अठोट व कलाकार हरिवंश आचार्यलिसेया अटुट सहकार्यया हुनिं थ्व प्रहसन सम्भव जूगु कलाकार केसीं धाःगु दु ।

“महजात्रां” स्वकुमिपिन्त समाजय् विद्यमान समसामयिक मुद्दायात हास्यशैलीपाखें न्ह्यब्वसें गम्भीर रुपं सोचेयायेत प्रेरित याःगु दु । नेपाःया समाजया परम्परा, राजनीति, सामाजिक संरचना व सांस्कृतिक कुरीतियात याःगु व्यंग्ययात स्वकुमिपिन्सं ययेकूगु दु ।

प्रहरसनय् कलाकार राजाराम पौडेल, शिवहरी पौडेल, नरेन्द्र कंसाकार, शैलेन्द्र सिम्खडा, यमन श्रेष्ठ, दिनेश काफ्ले व विभुषा बस्नेतं नं थःथःगु प्रस्तुति न्ह्यब्वयाच्वंगु दु ।

मह संचार व सुश्री मिडिया प्रा.लि.या सहकार्यस न्ह्यब्वःगु थ्व ज्याझ्वः “मह जात्रा” पाखें स्वकुमिपिन्त न्हिइकेगु जक मखु, समाजप्रति नवीन दृष्टिकोण तयेत प्रेरित याइगु विश्वास ग्वसाः खलःया दु ।

मीरा फाउण्डेसन व मानव सेवा आश्रमया ग्वाहालिया नितिं ग्वसाः ग्वःगु ज्याझ्वः कार्तिक २९ गतेनिसें न्ह्याःगु “मह जात्रा” मंसीर, १, ४, ५,६, १२, १३, १७ व १८ गतेतक ब्वज्या जुइगु जूगु दु ।

Categorized in कला