नेवा: अनलाइन न्युज | नेपाल संवत ११४४ कौलागा एकादसी (२०८१ कार्तिक १२ गते) सोमवाः

साफ वुमन्स च्याम्पियनसिप २०२४ या नितिं नेपाः व बंगलादेश ल्वाइगु जूगु दु ।

नेपाः व बंगलादेशं आइतवाः सेमिफाइनल कासा त्याकूसें फाइनलय् नापलायेगु पक्का याःगु दु ।

थ्वसिबें न्ह्यः सन् २०२२ स येँय् हे जूगु साफय् नं थुगु हे निगू पुचः ल्वाःगु खः । गुगु कासाय् नेपाःयात बुकाः बंगलादेश न्हापांगुखुसि च्याम्पियन जूगु खः ।

न्हयक्वःगु संस्करणया च्याम्पियनसिपया आइतवाःया न्हापांगु सेमिफाइनल कासाय् साविक विजेता बंगलादेशं भुटानयात ७–१ गोल अन्तरं बुकाः फाइनलय् थाय् दयेकूगु खः ।

घरेलु पुचः नेपालं धाःसा तनावग्रस्त सेमिफाइनल कासाय् न्याक्वःतक विजेता जुइधुंकूगु भारतयात पेनाल्टी सुटआउटय् ४–२ गोल अन्तरं बुकुसें फाइनलय् थ्यंकूगु खः ।

फाइनल कासा बुधवाः जुइगु जूगु दु ।

नेपाः समग्रय् खुक्वःतक  व बंगलादेश स्वक्वःतक फाइनल थ्यंकूगु खः । मदिक्क स्वक्वःतक घरेलु मैदानय् साफ वुमन्स च्याम्पियनसि म्हिताच्वंगु नेपाःया पुचः थुगु खुसि च्याम्पियन जुइगु आज्जुइ पलाः न्ह्याकाच्वंगु दु ।

Categorized in कासा