नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व तृतीया (२०८१ असार २५ गते) मंगलवाः

येँ महानगरपालिकाया मेयर बालेन शाह नं आर्थिक दँ २०८१/०८२ या नितिं न्ह्यब्वःगु ६४ बुँदे नीति व ज्याझ्वः संशोधनलिसें थौं मंगलवाः पारित जुइगु जूगु दु ।

थौं मंगलवाः न्हिनसिया स्वता इलय् येँ महानगरपालिकाया नगरसभा सःतातःगु दुसा उगु सभाय् येँ महानगरपालिकाया एमाले, कांग्रेस व एकीकृत समाजवादीया वडाध्यक्षपिन्सं मंकाः कथं तःगु २८ बुँदे संशोधन प्रस्तावयात मेयर बालेनं स्वीकार यासें पारित यायेत्यंगु खः ।

म्हिगः सोमवाः येँ महानगरपालिकाया वडाध्यक्षलिसें उपप्रमुख सुनिता डंगोलपिं संशोधन प्रस्तावयात कयाः मुँज्या च्वंगु खःसा उगु मुँज्यां २८ बुँदे संशोधन प्रस्ताव न्ह्यब्वयेगु निर्णय याःगु खः ।

मेयर शाह नं थौं बैठक च्वनेन्ह्यः हे छु छु बुँदा सहमत यायेमाःगु खः उकियात औपचारिक निर्णय यायेत इनाप याःकथं म्हिगःया मुँज्या च्वंगु खःसा म्हिगःया मुँज्या लिपा थौं नगरसभाया बैठक सःतूगु खः ।

संशोधन प्रस्तावय् न्हूसतक व हाडीगांयात “नो भेहिकल जोन” यायेगु प्रस्ताव लितकाइगु जूगु दुसा अथेहे छुं नं समिति येँ महानगरपालिकां दयेकीबलय् समानान्तर समिति दयेके मदइगुलिसें थीथी प्रस्तावत संशोधनय् लाःगु दु ।

थ्वया न्ह्यः वंगु असार १० गते मेयर शाह नं नगर परिषद बैठक च्वनेगु निर्णय याःगु खःसा उगु दिं स्वयं मेयर बालेन शाह उपस्थित मजुइवं नगर सभाया मुँज्या च्वने मफूगु खः ।

थौं मंगलवाः च्वनीगु मुँज्यां येँ महानगरपालिकाया नीति व ज्याझ्वः थ्व दँया बजेट सर्वसम्मतिं पारित जुइत्यंगु दु ।

Categorized in स्थानिय-समाज