येँ महानगरपालिकाया नीति व कार्यक्रम दयेकेगु नितिं म्हिगः आइतवाःनिसें महानगरपालिकाया मेयर विद्यासुन्दर शाक्य, उपमेयर हरिप्रभा खड्गीलिसें वडाध्यक्षपिं धौख्यः रिसोर्टय् च्वनाच्वंगु दु ।

आइतवाः न्हिच्छि धैथें नीति व कार्यक्रमया लिसें राजस्व संकलनयात कयाः सहलह जूगु दु । थुगु सहलह थौं सोमवाः नं न्हिच्छि जुइगु व सनिलया दुने नीति व कार्यक्रम राजस्व संकलन सम्बन्धय् उगु सहलह मुँज्यां थीथी निर्णयत क्वःछीगु जूगु दु । थौं हे वय्कःपिं मुँज्या क्वचायेकाः येँय् लिहाँ झाइगु ज्याझ्वः दु ।

नेवाः अनलाइन न्यूजया टेलिफोन वार्ताय् येँया १७ वडाया वडाध्यक्ष राजस्व विभागया प्रमुख नविन मानन्धरं उगु मुँज्यायात कयाः जानकारी बियादीगु दु ।

वय्कलं बियादीगु जानकारी थुकथं दु ।

–१० प्लस २ यानाः करदातापिन्त अलमल मयाःसे १२ प्रतिशतय् नगरपालिकां उठेयायेगु खँ जूगु दु ।

–१२ प्रतिशत कर अप्वः जुल, उकिं ५ निसें ६ प्रतिशत कर जक जुइमाः धैगु फुक्क वडाध्यक्षपिनिगु विचाः दु ।

–राजस्वया दर म्हो यानाः करया दायरा अप्वः यायेगु बांलाइ धैगु सकसिगुं बिचाः दु ।

–न्हापाया दँय् १२ अर्ब राजस्व उठेयायेगु योजना दुसां ४ अर्ब जक उठेजुल ।

–थ्व दँय् अथे मजुइमा धकाः सकसिनं च्यूताः काःगु दु ।

–थ्व दँय् १५ अर्ब राजस्व उठेयायेमाः ।

–राजस्व उठेयायेगु नितिं वडाय् वडाय् राजस्व डेस्क तयेगु व घरदैलो कार्यक्रम यायेगु सहलह जूगु दु ।

–महानगरपालिकाया नीति व कार्यक्रम असार १० गते नगर परिषदया बैठकय् सार्वजनिक यायेगु ज्याझ्वः तयातःगु दु ।

(थन क्लीक यानाः पूवंक न्यनादिसँ, वडाध्यक्ष मानन्धरलिसे जूगु टेलिफोन वार्ता )