नेवा: अनलाइन न्युज | नेपाल संवत ११४४ कौलागा तृतीया (२०८१ कार्तिक ४ गते) आइतवाः

थ्वहे वइगु मंसीर १६ गते जुइगु स्थानीय तह उपनिर्वाचनय् किपू नगरपालिकाय् नेकपा एमालेपाखें आकांक्षी मेयर उम्मेदवार युवा समाजसेवी राजकमल महर्जनं युवापिंके हिउपाःया शक्ति दूगु धारणा तयादीगु दु ।

महर्जनं धयादीगु दु, “थौंया युगय् सकसिनं स्यूगु हे खँ खः कि झीपिं पिढीँया भविष्य खः । संसारया थीथी मुद्दात, गथेकि जलवायु परिवर्तन, लैंगिक समानता, आर्थिक विषमता व सामाजिक न्यायथें जाःगु चुनौतीइ झीगु सः व सहभागिता अतिकं महत्वपूर्ण जू ।”

झीगु सोच, ज्या व दृष्टिकोणं समाजय् तःधंगु हिउपाः हयेफु । झीत विश्वास दुकि तापाःगु दृष्टिवाला सोच व साहसिक पलाखं जक मखु, परामर्शलिसें सहकार्य व समर्पणपाखें नं न्हूगु लँपुइ यात्रा यायेफइ धकाः युवा समाजसेवी राजकमल महर्जनं धयादीगु दु ।

किपू नगरपालिकाया एमालेपाखें आकांक्षी मेयर उम्मेदवार युवा समाजसेवी राजकमल महर्जनं धयादीगु दु, “युवापिन्सं हिउपाःया शक्ति प्रष्फुटन याइ । युवापिन्सं शिक्षा, प्रविधि व सिर्जनशीलताया छ्यलाबुला यानाः समस्याया समाधान यायेत व न्हूगु सम्भावना ब्वलंके फइ । यदि युवा शक्ति थःथवय् नापं च्वनाः ज्या यात धाःसा, न्ह्यात्थे जाःगु चुनौतीयात सामना यायेत सक्षम जुइ ।”

जनसमुदाययात सदां सकारात्मक जुयादीत इनाप यासें व थःपिनिगु म्हगस पूवंकेत प्रयासरत जुयादिसँ लिसें भविष्य जनसमुदायया हे ल्हाःतलय् दूगु विचाः प्वंकूसें युवा समाजसेवी महर्जनं धयादी, “थौंया ज्यां कन्हय्या संसारयात गुज्वःगु दयेकी, विचाः यानादिसँ । झीगु धैर्य, संघर्ष व कुतलं हे झीगु भविष्य निर्धारित याइ । थौंया दिंयात प्रेरणा व संकल्पया दिंया रुपं कायेनु व झीगु मंकाः जिम्मेवारीयात मनन यासें छगू न्हूगु हिउपाःया सुरुवात यायेनु ।”

किपू नगरपालिकाय् मेयर राजकुमार महर्जन आकाझाकां मदुगुलिं आः वइगु मंसीर १६ गते जुइगु स्थानीय तहया उपनिर्वाचनय् किपू नगरय् नं मेयर पदया नितिं उपनिर्वाचन जुइगु जूगु दु ।

उगु उपनिर्वाचनय् किपू नगरपालिकाय् नेकपा एमालेपाखें किपू नगरया पुलांम्ह मेयर रमेश महर्जन, किपू नगरपालिकाया हे पुलांम्ह मेयर उम्मेदवार केशरत्न बज्राचार्य, पुंलांम्ह उपमेयर उम्मेदवार विन्दु महर्जनलिसें युवा समाजसेवी राजकमल महर्जनपिनिगु नां आंकाक्षी मेयर उम्मेदवार कथं नां न्ह्यःने वयाच्वंगु दु ।

विशेष स्रोत कथं नेकपा एमाले केन्द्रपाखें थ्वयां न्ह्यःया निर्वाचनय् थें किपू नगरपालिकाया आः जुइगु उपनिर्वाचनय् गल्ती मयाइगु धैगु खँ हुइनाभुइना जुयाच्वंगु दुसा पुलांम्ह मेयर रमेश महर्जन व राजकमल महर्जन निम्हमध्ये छम्हेसित मेयर उम्मेदवार याइगु खँ नं अपुष्ट रुपं हुइनाभुइना जुयाच्वंगु दु ।

किपू नगर दुनेया सचेत जनसमुदायं धाःसा स्थानीय तह उपनिर्वाचनय् मेयर पदया नितिं उम्मेदवार ल्ययेगु खःसा सकल पार्टीं स्थानीय रुपं हे ल्ययेमाःगु व केन्द्रया शक्ति छ्यलेमज्यूगु धारणा तयाः वयाच्वंगु दु ।

Categorized in स्थानिय-समाज