२०७९ आषाढ २२, बुधबार १०:२७:०४

थौंकन्हय्या इलय् झीपिंमध्ये सायद हे थुज्वःम्ह सुं मनू दइ, गुम्ह स्मार्टफोन विना थःगु छेँपाखें पिहाँ वनी ।

हरेक ज्या व मनोरञ्जनया नितिं झीपिं थःगु मोबाइल फोनय् निर्भर जुइगु याइ । तर मोबाइल फोनया आविष्कार याःम्ह व्यक्तिं न्हिच्छिया दुने गुलि ई मोबाइल चलेयाइ जुइ, छिं स्यूला ?

मोबाइल फाोनया आविष्कारक मार्टिन कूपर खः । आः नकतिनि जक  छगू अन्तर्वार्ताया झ्वलय् कूपरं न्हिथं गुलि ई स्मार्टफोन चलेयाइ धैगु खँया खुलासा याःगु दु ।

मार्टिन कूपरं सन १९७३ स मोबाइल फोनया आविष्कार याःगु खः । कूपर आः ९३ दँय् च्वनाच्वंगु दु ।

आः नकतिनि जक BBC Breakfast ज्याझ्वलय् कूपरं छगू अन्तर्वार्ता ब्यूगु खः । उगु ज्याझ्वलय् न्वःवासें कूपरं थःम्हं हरेक २४ घौ दुने ५ प्रतिशतसिबें नं म्हो ई स्मार्टफोनय् बितेयायेगु खुलासा याःगु दु ।

अन्तर्वार्ताया झ्वलय् अन्तर्वार्ताकार जेन म्याककुबिनं थःम्हं न्हिच्छिया दुने न्याघौ स्मार्टफोन चलेयायेगु धाःगु खः । जेनं थथे धाःबलय् कूपर अजूचाःगु खः । वं जेनयात जीवन प्राप्त याः धैगु कामना यात व हाकनं न्हिलेगु यात ।

मार्टिन कूपरं थःम्ह २४ घौ दुने ५ प्रतिशतसिबें नं म्हो ई स्मार्टफोन चलेयायेगु यानागु धासें स्मार्टफोनया छ्यलाबुला म्हो सिबें म्हो यायेमाःगु सल्लाह ब्यूगु दु । लिसें कूपरं भर्चुअल जिन्दगीयात त्वःताः वास्तविक जीवनय् म्वायेमाःगु न्ह्यथंगु दु ।

लुमंकेबहःजू, मार्टिन कूपरं सन् १९७३ या अप्रिल ३ स हलिंया हे दकले न्हापां मोबाइल फोनया आविष्काकर याःगु खः । उगु मोबाइल फोन दयेकेगु नितिं कूपरयात केवल स्वला (३ महिना) या ई तूगु खः ।

कूपरं मोटोरोला कम्पनीया कर्मचारीपिंलिसे जानाः उगु मोबाइल फोन दयेकूगु खः । न्हापांगुखुसि मोबाइल फोन निर्माणया नितिं मोटोरोला कम्पनीं १० करोड डलर लगानी याःगु खः ।