नेवा: अनलाइन न्युज | नेपाल संवत ११४५ कछलागा खस्थि (२०८१ मंसीर ६ गते) बिहिवाः

अष्ट्रेलियाली संसदया तल्लो सदनय् पेस याःगु छगू विधेयकय् १६ दँ क्वय् च्वंपिं मचापिन्त सामाजिक संजालया छ्यलाबुलाय् प्रतिबन्ध तयेगु प्रस्ताव याःगु दु ।

बिहिवाः पेस याःगु उगु विधेयक न्ह्यःने वंसां छुं छुं सामाजिक संजालय् मचातय्गु पहँचय् बन्देज जुइगु जूगु दु ।

अष्ट्रेलियाया प्रधानमन्त्री एन्थोनी अल्बानीजं धाःगु दु, “थ्व प्रतिबन्ध एक्स, टिकटक, फेसबुक व इन्ष्टाग्राम जुइ ।”

प्रधानमन्त्री अल्बानीजं न्हूगु कानून कार्यान्वयनय् वयेधुंकाः सामाजिक संजालया हानीपाखें मचापिन्त बचेयायेत ग्वाहालि जुइगु धाःगु दु ।

अष्ट्रेलियाया न्हूगु कानूनं थुज्वःगु प्रतिबन्धया नितिं छगू स्पष्ट रुपरेखा प्रदान याइ । १७ पृष्ठ ताःहाकःगु थ्व दस्तावेज मेगु वाः अष्ट्रेलियाया सिनेटय् पेस जुइगु जूगु दु ।

बीबीसीया कथं अष्ट्रेलियाय् आपालं अभिभावकपिन्सं थ्व पहलयात लसकुस याःगु दु ।

तर, आपालं विज्ञपिन्सं थुकिया बारे न्ह्यसः नं ल्ह्वनाच्वंगु दु । मचापिन्त सामाजिक संजालपाखें तापाक्क तयेगु व वपाखें पनेत सम्भव दु कि मदु धैगु इमिगु धापू दु ।

Categorized in अन्तर्राष्ट्रिय