नेवा: अनलाइन न्युज | नेपाल संवत ११४५ कछलागा पंचमी (मंसीर ५ गते) बुधवाः

भारतीय गुण्डा नाइके लरेन्स विश्नोईया नां कयाः नेपाली व्यवसायीपिन्त धम्की बियाच्वंगु धासें प्रहरीइ उजुरी लाःगु दु ।

केन्द्रीय अनुसन्धान ब्यूरो (सीआईबी)इ छुं दिं न्ह्यः विश्नोईया नां कयाः धम्की ब्यूगु धासें उजुरी लाःगु एसपी होबिन्द्र बोगटीं पुष्टि याःगु दु । बोगटीं धाःगु दु, “विदेशी नम्बरपाखें फोन यानाः धम्की ब्यूगु धासें न्हापा हे उजुरी लाःगु खः ।”

थुज्वःगु फोन भारत व दुबईया नम्बरपाखें वइगु जुयाच्वंगु दु । विश्नोई आः भारतया दकले कडा सुरक्षा दूगु तिहाड जेलय् दु । वयात फिरौती असुली व हत्याया द्वपं दु । न्हापा विश्नोई महाराष्ट्रया सेन्ट्रल जेल भरतपुरय् च्वनाच्वंगु खः । लिपा जेल दुनेपाखें हे गिरोह न्ह्याकूगु सीदयेधुंकाः तिहाड जेलय् यंकूगु खः । वं तःक्वःमछि भारतीय अभिनेता सलमान खानयात नं स्यायेगु धम्की ब्यूगु खः ।

अनुसन्धान अधिकृतपिनिगु कथं, नेपालय् ब्यूगु धम्कीइ नं विश्नोईया संलग्नता दुथें खनेमदु । वया नां कयाः मेपिं सुनां धम्की ब्यूगु जुइफूगु अधिकृतपिनिगु अनुमान दु ।

अथेहे कथंया धम्की झापाया विवादास्पद मेडिकल व्यवसायी दुर्गा प्रसाईंया नामय् नं वःगु धासें सीआईबीतक गुनासो थ्यंगु दु । एसपी बोगटीं धाःगु दु, “थ्व फुक्क विषयस केन्द्रीत जुयाः अनुसन्धान यानाच्वनागु दु ।”

दुर्गा प्रसाईंयात प्रहरीं मंगलवाः विद्युतीय अपराध नियन्त्रण ऐन अःखःया कसुर याःगु द्वपनय् गिरफ्तार याःगु दु । थ्वलिसें धम्कीया मामला सम्बन्धी अनुसन्धानयात तकं प्रहरीं प्राथमिकता ब्यूगु दु ।

सीआईबीया प्रमुख आईजी दिपक थापाया कथं, विद्युतीय अपराध नियन्त्रण ऐन अःखःया कसुरय् मातहतया साइबर ब्यूरों अनुसन्धान याइसा मेमेगु विषयस सीआईबीपाखें अनुसन्धान जुइ ।

Categorized in दुर्घटना-अपराध