नेवा: अनलाइन न्युज | २०७३ माघ २१, शुक्रबार १९:२५:३८

अमेरिकायात विश्वया दकलय् धनी अले सभ्यतय्गु देय्या रुपय् कायेगु याना वयाच्वंगु दु । सभ्य धकाः संसारय् नां जाःसां यौनया मामलाय् उदार अमेरिकीत यौनरोगं ग्रस्त जुयाच्वंगु छगू अध्ययनं क्यंगु दु । अमेरिकाया प्यब्वय् छब्व मिसातय्त यौनरोग जुयाच्वंगु छगू अध्ययनं क्यंगु दु । अथे धइगु प्यम्ह मध्ये छम्ह अमेरिकी मिसा यौनरोगं ग्रस्त जुयाच्वंगु दु । अमेरिकाया सेन्टर्स फर डीजीज कन्ट्रोल(सीडीसी)या थुगु अध्ययनय् धयातःगु दु कि यौनजन्य रोगं ग्रसित मिसात मध्ये हाकु जातियापिं आपा दु । थुगु तथ्याङ्क अमेरिकाया १४ दँ निसें १९ द“यापिं च्यासः व स्वीच्याम्ह मिसातय् जाँच व अध्ययनया विश्लेषण याना पिथंगु खः ।
    यौनरोग मध्ये नं गर्भासयया क्यान्सर जुइकेत जिम्मेवार भाइसर ‘एचपीभी’या समस्या आपा खनेदुगु दु । थुकिया लिपा क्ल्यामिडिया, ट्राइकोमोनियासिस व हर्पीस थें जाःगु ल्वय् नं लुयावःगु दु । अध्ययन न्ह्याकुगु संस्था सीडीसीं धाःगु दु कि थुकथंया अध्ययनं यौनजन्य ल्वय्या शिकार आपा यानाः नच्चाल्यासेपिं जुयाच्वंगु क्यंगु दु । थुगु अध्ययनं म्होतिं नं बच्छि अफ्रीकन–अमेरिकी मिसात म्होतिं नं छगू न छगू यौनजन्य ल्वचं ग्रसित जुयाच्वंगु दु अले २० प्रतिशत श्वेत व म्याक्सिकन–अमेरिकी मिसातय्त थुकथंया समस्या जुयाच्वंगु दु । यौनरोगं ग्रस्त मिसात मध्ये १८ प्रतिशत मिसात एचपीभीया शिकार जूगु नं न्ह्यथनातःगु दु ।
    सीडीसीया डेविड फेन्टनं धाःगु दु कि थ्व छगू तसकं गम्भीर मामला खः छाय्धाःसा थुकथंया नच्चाल्यासेपिन्त जुइगु यौनरोगं बाँझोपन व गर्भासयया क्यान्सरथेंज्याःगु समस्यात ब्वलंकेफु । फेन्टनं धाःगु दु कि यौन सम्बन्ध दयेकीपिं मिसातय्त नियमित जाँच, खोप अले बचावटया मेमेगु उपायत नालेगु थःपिनिगु मुख्य प्राथमिकता खः । क्ल्यामिडिया ल्वय् इलय् हे लुइकेगु लागि यौन–सक्रिय जुयाच्वंपिं २५ दँ स्वयाः म्हो उमेरयापिं मिसातय् नियमित जाँच यायेमाः धाःसा एभपीभीपाखें बचे यायेगु लागि ११–१२ दँ तकया मिसातय्त खोप बिइमाः धाःसा लिपा बूस्टरया खोप नं बिइमाः । थन लुमंकेबहःगु खँ छु धाःसा अमेरिका विश्वयाहे दकलय् आपा कण्डम बिक्रि वितरण जुइगु देय्या रुपय् वयाच्वंगु अवस्थाय् प्यम्हय् छम्ह अमेरिकी मिसामचा यौनरोगं ग्रस्त जुयाच्वंगु दु । कण्डम छ्यल धाःसा थीथीकथंया यौन रोगपाखें सुरक्षित जुइ धकाः यानाच्वंगु प्रचार गुलित सत्य व सफल खः धइगु थौं सवाल न्ह्यःने वयाच्वंगु दु ।
    यौन छगू अति संवेदनशील बिषय जुया नं गोप्यता अले मेगु यक्व कारणं यानाः थ्वप्रति उलि ध्यान वनाच्वंगु मदु । अथे जूगुलिं थीथी यौनरोगं ग्रस्त जुइकाः नं मनूतसें वाः मचायेकेगु तकं यानाच्वंगु लुइकेफु ।