नेवा: अनलाइन न्युज | नेपाल संवत ११४४ कौलागा चौथी (२०८१ कार्तिक ५ गते) सोमवाः

राष्ट्रिय स्वतन्त्र पार्टीं सभापति रवि लामिछाने गिरफ्तार याःगु विरोधय् सोमवाः स्वन्हुया दिं नं पोखराय् विरोध प्रदर्शन याःगु दु ।

न्हिनय् १२ ता ईनिसें पृथ्वीचोकय् मुनाः रास्वपाया नेता कार्यकर्तापिन्सं विरोध प्रदर्शन याःगु खः ।

शनिवाः चिप्लेढुंगाय् विरोध सभा याःगु रास्वपां आइतवाः शहिदचोकय् कार्यकर्ता क्वताःगु खः ।

सोमवाः प्रदर्शन जुइगु थाय् हिलाः पृथ्वीचोकय् याःगु खः । विरोध प्रदर्शन शान्तिपूर्ण जुजुं हूलदंगा जूगु दु । प्रहरीं प्रदर्शनकारीपिन्त लःया फोहोरां क्ययेकूगु दु ।

स्वन्हुया दिं विरोध प्रदर्शनय् मूपिं नेता कार्यकर्तापिन्सं देशभक्तिपूर्ण म्ये थ्वयेकूसें प्याखँ ल्हुइगु तकं याःगु खः । कार्यकर्तां वर्तमान सरकारविरुद्ध नाराबाजी याःगु खः ।

“सरकार छंगु पारां, दुःख सिल सारां...सहकारी पीडितयात न्याय ब्यु, सरकारं न्याययात यात घात, पोखरेली जनतां बिइ साथ” लगायतया नारा थ्वयेकूगु खः ।

अदालतं रास्वपा सभापति रवि लामिछानेयात बुधवाःतक थुनाय् तयाः अनुसन्धान न्ह्याकेत आदेश ब्यूगु दु । बुधवाःतक नियमित विरोध प्रदर्शन यायेगु नीति विभागया सचिव कमल सुवेदीं जानकारी ब्यूगु दु ।

सुवेदीया कथं पार्टी नेतापिं बुधवाःतक पोखराय् हे दइ । बुधवाः अदालतया आदेशलिपा जक पार्टीं थप धारणा दयेकीगु सुवेदी धाःगु दु । सुवेदीं धाःगु दु, “आः विरोध पोखरा केन्द्रीत जूगु दु । उगु ईतक नेतापिं पोखराय् हे च्वनी ।”

शुक्रवाः प्रहरीं सभापति लामिछाने गिरफ्तार यायेधुंकाः मुक्कं पार्टी पोखराय् केन्द्रीत जूगु दु । अधिकांश नेतापिं पोखरा थ्यंकुगु दु । पूर्व घोषित ज्याझ्वःत दिकूगु दु । कार्तिक १ गतेनिसें न्ह्याःगु जिल्ला भेला सम्मेलन नं स्थगित याःगु दु ।

Categorized in राजनीति