न्हूसतकय् स्थानीयबासीलिसे मेयर बालेनं वार्ता यात
![](https://www.newaonlinenews.com/sites/default/files/balen%20nhu%20satak.jpg)
नेवा: अनलाइन न्युज | नेपाल संवत ११४४ दिल्लागा पारु (२०८१ साउन ७ गते) सोमवाः
येँ महानगरपालिका २२ वडा लागाय् लाःगु जुद्ध शालिकंनिसें पुलां भन्साः वनेगु लँपु चीब्या यानाः पेटी तब्या यायेत्यंगु विरुद्ध आन्दोलन यानाच्वंपिं स्थानीयबासी व २२ वडाया वडाध्यक्षलिसे येँ महानगरपालिकाया मेयर बालेन शाह नं थौं सोमवाः सुथनिसें वार्ता न्ह्याकूगु दु ।
येँ महानगरपालिकाय् जुयाच्वंगु उगु वार्ताय् २२ वडाया वडाध्यक्ष चिनीकाजी महर्जन, २१ वडाया वडाध्यक्ष उदय चुडामणि बज्राचार्य, २३ वडाया वडाध्यक्ष मचाराजा महर्जनलिसें थीथी वडाया वडाध्यक्षपिन्सं ब्वति काःगु खँ सीदूगु दु ।
येँ महानगरपालिकां २४ वडा लागाय् लाःगु वंघःनिसें जुद्ध शालिकतकया लँपु चीब्या यानाः पेटी तब्या यायेगु ज्या न्ह्याकेधुंकाः वंगु प्यन्हु न्ह्यःनिसें २२ वडा लागाय् लाःगु न्हूसतकय् पेटी चीब्या यायेत डोजर हःगु खः ।
स्थानीयबासीं लँपु चीब्या यायेमज्यूगु धासें मदिक्क न्हूसतकय् च्वनाः विरोध याःगु खःसा स्वयं उगु वडाया वडाध्यक्ष महर्जनं न्हूसतकय् वडाबासीयात वडापाखें बिइमाःगु सेवा बिइगु ज्या याःगु खः ।
येँ महानगरपालिकां उच्च अदालत यलं महानगर दुनेया लँ स्थानीय निकाय दुने लाःगु धासें सतक विभागयात अन्तरिम आदेश जारी याःगु खः । थथे अन्तरिम आदेश जारी याःगु निन्हु लिपा हे महानगरपालिकां न्हूसतकय् लँपु चीब्या यानाः पेटी तब्या यायेगु ज्या न्ह्याकूगु खः ।
थ्वया न्ह्यः येँ महानगरपालिकां न्हूसतकया लँ चीब्या यायेगु ज्या यायेवं स्थानीयबासीपिन्सं विरोध याःगु खःसा सतक विभागं न्हूसतकया लँ दयेकेगु अधिकार महानगरपालिकायाके मदु धासें लँ तब्या यायेत म्हुइधुंकूगु लँपु हाकनं पीच यायेगु तकं ज्या याःगु खः ।
Categorized in स्थानिय-समाज