न्हूदँ समारोह समिति व शंखधर प्रतिष्ठानं प्रधानमन्त्री ओलीयात नापलात
नेवा: अनलाइन न्युज – ललेन्द्र शाक्य | नेपाल संवत ११४४ कौलागा चौथी (२०८१ कार्तिक ५ गते) सोमवाः
नेपाल संवत न्हूदँ राष्ट्रिय समारोह समिति ११४५ या नायः राजेन्द्र प्रसाद श्रेष्ठया नेतृत्वय् थौं सोमवाः प्रधानमन्त्री केपी शर्मा ओलीयात नापलाःगु दु ।
प्रधानमन्त्री निवास बालुवाटारय् प्रधानमन्त्री ओलीयात समारोह समितिया नायः श्रेष्ठं न्हूदँया लसताय् येँया बसन्तपुरय् कछलाथ्व पारु (कार्तिक १७ गते) शनिवाः जुइगु भिंतुना सभा ज्याझ्वलय् मूपाहाँ कथं झायेत इनाप यासें ब्वना पौ लःल्हाःगु खः ।
अथेहे, प्रधानमन्त्री ओलीयात नेपाल संवतयात कयाः न्हयगू बुँदे ध्यानाकर्षण पौ नं लःल्हाःगु दु ।
थथे लःल्हाःगु ध्यानाकर्षण पतिइ नेपाःया नोटय् नेपाल संवत तयेमाःगु, नेपाल संवत सरकारी दस्तावेजय् छ्यलेत याःगु निर्णय कार्यान्वयन यायेगु नितिं सरकारं परिपत्र जारी यायेमाःगु, राष्ट्रिय विभूति शंखधर साख्वाःया नामं राष्ट्रिय सिरपाः घोषणा यायेमाःगु लिसेंया खँ न्ह्यथनातःगु दु ।
प्रधानमन्त्री नापलायेगु उगु ज्याझ्वलय् न्हूदँ समारोह समितिया संरक्षक हितकरवीर सिं कंसाकारं नेपाल सरकारं नेपालभाषां नेपाल टेलिभिजनय् समाचार प्रसारण व राससय् नेपालभाषां बुलेटिन प्रकाशन याःगुलिं नेपाल सरकारयात सुभाय् देछानादीगु खः ।
अथेहे, न्हूदँ समारोह समितिया संरक्षक नेवाः न्ह्यलुवाः मल्ल के सुन्दरं नेपाल संवतयात कयाः सरकारपाखें यायेफूगु ज्या तत्काल यायेमाःगु विचाः प्वंकादिसें थुगु दँय् सरकारपाखें नेपाःया नोटय् नेपाल संवत छ्यलीगु व नेपाल संवतयात फुक्क थासं छ्यलेगु नितिं परिपत्र जारी यायेत इनाप यानादीगु खः ।
थथे प्रधानमन्त्री नापलायेगु ज्याझ्वलय् नेवाः देय् दबूया नायः पवित्र बज्राचार्य, पूर्वमन्त्री लिसें सांसद कृष्णगोपाल श्रेष्ठ, पूर्वराज्यमन्त्री दिलीप महर्जन, नेपाल संवत न्हूदँ राष्ट्रिय संरक्षण समितिया नायः प्रा.डा. नरेशमान बज्राचार्यलिसें थीथी व्यक्तिपिं उपस्थित जुयादीगु खः ।
अथेहे, राष्ट्रिय विभूति शंखधर प्रतिष्ठानया दुजःपिन्सं नं प्रधानमन्त्री ओलीयात थौं सोमवाः हे नापलानादीगु दु ।
प्रतिष्ठानया नायः ज्ञानुराम श्रेष्ठया नेतृत्वय् वःगु पुचलं नेपाल संवतयात सरकारी ज्याखँय् छ्यलाबुलाय् हयेगु निर्णय लिपा उगु निर्णय राजपत्रय् पिथनेमाःगु माग यासें न्हूदँ ११४५ या लसताय् थिमिइ शंखधर चुकय् कछलाथ्व पारुया दिं जुइगु ज्याझ्वलय् प्रधानमन्त्री ओलीयात मूपाहाँ कथंझायेत ब्वना पौ लःल्हाःगु खः ।
Categorized in राष्ट्रिय
