भाषासेवी, समाजसेवी, उद्योगपति, राजनीतिज्ञलिसें साल्ट ट्रेडिङ कर्पोरेशन लिमिटेडया नायः भाजु लक्ष्मीदास मानन्धर झीगु ख्यलय् परिचय बियाच्वनेमाःगु नां मखु । वय्कः निरन्तररुपं थ्व ख्यलय् पानावयाच्वनादीम्ह मन चकंम्ह व्यक्ति खः । वय्कःलिसे नेवाः अनलाइन न्यूजपाखें यानागु खँल्हाबल्हा न्ह्यब्वयाच्वना ।  

साल्ट ट्रेडिङया चुनाव जुइत्यंगु दु । छि हानं अध्यक्ष पदय् च्वनादीगु बिचाः दु ला ? 

–चुनावय् दनेगु स्थिति थ्यंक ला वइ मखु जुइ । तर जि साल्ट ट्रेडिङ कर्पोरेशन लिमिटेडया स्थापनानिसें आःतक आवद्ध जुयागु नातां व च्यादँतक नायः जुयागु नातां पासापिसं, शेयर होल्डरपिसं विश्वास यात धाःसा अझ नं ज्या याये फु । साल्ट ट्रेडिङय् पद सिबें नं ज्या याये फुपिं मनूत तत्काल निर्णय यायेफुपिं मनूया आवश्यकता दु । थ्व ल्याखं अध्यक्ष ल्यइ भलसा जिं कया ।

आयो नूनया सम्बन्धय् थ्व चि वास्तवय् थुलि लोकं ह्वाःगु कारण छु खः ? 

–नेपालया सवालय् कायेगु खःसा आयो नून म्हुतु साकेगु निंतिं जक चि मखु । दक्षिण एसियाय् हे नेपालय् आयोनून वयेधुंकाः गलः वइगु ल्वय् म्हो जूगु तथ्यांक सकसियां न्ह्यःने दु । थौं नेपालय् गलः वःपिं मनूत खनेमदये धुंकल । थ्व जिमिगु कर्पोरेशनं वितरण यानावयाच्वनागु आयोडिनयुक्त चि आयोनूनया हे कारणं खः । मेता खँ जिमिगु कर्पोरेशनं भारतं अवैध रुपं दुहाँवयाच्वंगु अखाद्य चिया आयातयात निरुत्साहित यायेगु व नेपाःया कुंकुलामय् वनाः आयोडिनयुक्त चिया उपभोगं जुइगु फाइदाया विषयलय् जनचेतना थनेगु ज्या नं यानागु दु । थौं नेपाःया ९० प्रतिशतं मल्याक मनूतय्सं साल्ट टे«डिङपाखें विक्री वितरण जुयाच्वंगु चि उपभोग यानावयाच्वनादीगु दु ।

साल्ट ट्रेडिङ बाहेक मेथाय् छि गन गन आवद्ध जुयाच्वना दीगु दु ? 

–साल्ट ट्रेडिङय् ला जि अध्यक्ष हे जुल । थुकिया लिसें जि नारायणी नेशनल फाइनान्सय् अध्यक्ष जुयाः ज्या यानाच्वनागु दु । नेपाल उद्योग व्यापार महासंघया अध्यक्ष जुयाच्वनागु दु । कुष्ठरोग निवारण केन्द्रया संरक्षक जुयाच्वनागु दु । लिसें थःगु हे व्यवसायकथं भैरहवाय् कोल्डस्टोर तयातयागु दु । बुटवलय् पेट्रोलपम्प दु, पुलांगु हे धुँछाप मोजाया कारखाना चले यानाच्वनागु दु । छुं न्हि न्ह्यःजक चीन भ्रमणया झ्वलय् चाइनाया टायर कम्पनीनाप मिले जुयाः नेपालय् टायरया ज्या छगू नं याये त्यनागु दु । 

थुलिमछि थासय् आवद्ध जुयाः नं भाषा, धर्म, संस्कृतिया क्षेत्रय् गुकथं ई बियाच्वना दिया ? 

–न्हापां निसें हे सामाजिक ज्याखँ यानावयाच्वनागु कारणं उद्योगया नापनापं थुकथंया ज्याय् ई बीगु यानावयाच्वनागु कारणं आःतक नं ई बी फयाच्वंगु खः । फत्तले सने, फत्तले याये धइगु भावना जिके दु । उकिं हे जुइमाः जिं ई बी फयाच्वंगु । 

अन्तय् नेवाः अनलाइन न्यूज न्ह्याके त्यनागु सम्बन्धय् छिगु छुं बिचाः ।

–दकलय् न्हापां ला नेवाः अनलाइन न्यूजया सकल जःयात जिगुपाखें भिंतुना । जिं न्ह्याका च्वनागु अभियान धयागु नेवाःतय्सं थःगु भाय् त्वःते मजिल, उकिं नेवाः अनलाइनपाखें विश्वन्यंकं च्वनाच्वंपिं नेवाःतय्सं थुगु अनलाइन स्वयाः नेवाः भावना ब्वलंकी, विश्वया न्ह्यागु थासय् च्वनाच्वंपिं नेवाः जूसां नं नेवाः भाय् ल्हायेगु प्रेरणा ब्वलंकी धइगु विश्वास यानाच्वना । जिं मातृभाषा शिक्षाय् तसकं हे जोड बियाः ज्या यानावयाच्वनागु खँ छिकपिसं स्यूगु हे खः । जगत सुन्दर ब्वनेकुथि स्थापना कालंनिसें जि आवद्ध जुयाच्वनागु दु । दुःखया खँ नेपाल सरकारया भाषानीति स्पष्ट मदुगु कारणं यानाः स्कूलय् मातृभाषां आखः ब्वनीपिं न्हियान्हिथं म्हो जुजुं वनाच्वंगु दु । थ्व अनलाइनपाखें थ्व खँया नं प्रचार यानादी धइगु भलसा कयाच्वना । लिसें थ्व अनलाइन न्ह्याकेगु निंतिं जि फुगु ग्वाहालि यायेगु बचं नं बियाच्वना ।