ईलोहँ मचा लय्–पौया पिकाकः ईलोहँ प्रकाशनपाखें थ्वहे वइगु शनिवाः नेपाः ब्यांक्वेटय् निक्वःगु स्वनिगःब्यापी स्कूल स्तरीय नेपालभाषा साहित्य सम्मेलन ज्याझ्वः याइगु जूगु दु ।

अथेहे उगु हे न्हिइ मचा लय्–पौ ईलोहँ पिदंगु १८ दँ क्यंगु लसताय् थीथी ज्याझ्वः नं याइगु जूगु दु ।

ईलोहँ प्रकाशनं ब्यूगु जानकारी कथं बाखं, चिनाखँ व निबन्ध विधाय् न्हाप, ल्यू व लियांल्यूलिसें हःपाः सिरपाः त्याकूपिन्त ईलोहँ सायमि सिरपाः, ईलोहँ निवन्ध सिरपाः व ईलोहँ न्हूजः सिरपाः लःल्हाइगु जूगु दु ।

अथेहे, ईलोहँ प्रकाशनपाखें लःल्हानाः वयाच्वंगु थीथी सिरपाः ईलोहँ ज्ञानज्योति सिरपाः च्वमि धिरजनाथ अमात्ययात व ईलोहँ पतिइ पिदंगु लेख रचनायात लःल्हाइगु ईलोहँ एल्भिज जोशी सिरपाः बाल साहित्यकार प्रेम के. निडरयात लःल्हाइगु जूगु दु ।

थुगु ज्याझ्वःयात कयाः ईलोहँ मचा लय्–पौया सम्पादक दर्शनवीर शाक्यं नेपालभाषा साहित्य सम्मेलन ज्याझ्वः नेपालभाषा ल्यंकेगु नितिं यायेत्यनागु विचाः नेवाः अनलाइनन्यूजया टेलिफोन वार्ताय् कनादीगु दु ।

(वय्कःलिसे जूगु टेलिफोन वार्ता थन क्लीक यानाः न्यनादिसँ ।)