किपू नगरपालिका २ वडा द्यःध्वाखाय् च्वनादीम्ह सरीता बज्राचार्य, थौंकन्हय् स्पर्श म्यूजिक भिडियो अवार्ड २०२० य् जनजाति विधाय् तःमिम्ह..बोलया म्यूजिक भिडियोपाखें बेष्ट फिमेल मोडल टप ५ य् नोमिनेट जुयाच्वंगु दु । आपालं चिहाः संकिपा लिसें म्यूजिक भिडियो म्हितेधुंकूम्ह सरीता, थौंकन्हय् छम्ह व्यस्त मोडलया रुपं खनेदयाच्वंगु दुसा सरीता थौंकन्हय् छम्ह मेकअप आर्टिष्टया रुपं नं न्ह्यःने वयाच्वंगु दु । वय्कः सरीता बज्राचार्यलिसे नेवाः अनलाइनन्यूजया सम्पादक ललेन्द्र शाक्यं यानादीगु खँल्हाबल्हाया छुं ब्व न्ह्यब्वयाच्वना ।

१) दकले न्हापां सरीता जु, भिंतुना दु छि स्पर्श म्यूजिक भिडियो अवार्ड २०२० य् जनजाति विधाय् बेष्ट फिमेल मोडल टप ५ य् छनोट जुयादीगुलिं । नुगलय् गुज्वःगु अनुभव जुयाच्वंगु दु ?

सुभाय् दु, मनय् नुगःस्वां ह्वयाच्वंगु दु । जिगु अभिनययात कदर याःगु दु धैगु जिं तायेका । सकलसिनं जितः उगु अवार्ड त्याकेगु नितिं हःपाः व तिबः बियादी धैगु भलसा कयाच्वनागु दु ।

२) कलायात्राय् गुकथं पलाः लात ?

खास धायेगु खःसा कलायात्राया सुरुवात धैगु स्टेज प्रोग्रामं हे जूगु खः ख्यालः व हुलाप्याखं पाखें ।

३) प्रेरणा ब्यूम्ह सु खः ?

खास प्रेरणा धकाःला सुं नं मदु । जि न्हापांनिसें हे नेवाः म्यूजिक भिडियो स्वयेगु आपालं बानी दुम्ह जूगुलिं जि नं थ्व ख्यलय् वयेगु इच्छा नुगः दुने ब्वलनावःगु खः । थुकिया हुनिं हे जि थौं कलाकार जूगु जुइ ।

४) संकिपा ख्यलय् वयेन्ह्यः छिं छु यानादिया ?

अँ...थ्व संकिपा ख्यलय् वयेन्ह्यः न्हापा जिगु जागिर दूगु खः । अले जागिर नापनापं स्टेज शोया रुपं ख्यालः हुलाप्याखं न्ह्यब्वया थःगु प्रतिभा न्ह्यब्वयाः वयाच्वनागु खः ।

५) छिगु दकले न्हापांगु संकिपा व म्यूजिक भिडियो छु खः ?

संकिपा धकाः ला म्हितागु मदुनि । चिहाः संकिपा धाःसा यक्व म्हितागु दु । जिगु न्हापांगु चिहाः संकिपा धैगु नेवाः यूट्युब च्यानलपाखें निर्माण जूगु स्वापू नांया चिहाः संकिपा खःसा म्यूजिक भिडियो राजु मानन्धर दाईयागु म्येय् म्हितागु खः ।

६) आःतक अभिनय यानादियागु म्यूजिक भिडियो व संकिपा छु छु खः ?

जवल्हाःतं अन्ती ज्वना, योमरी, खुला खुला, मोहनी म्ये, खमुचा, भ्वाथःगु कुसा, काल जिगु, पिया च्वने, भुतुमाली, म्हंजक म्हंसा, छ न्हिलाः द, मचा छम्ह चीधी तुतु नयेधाइ, तःमिम्ह, लायकू दरबारय्, नयेत्वने यतले, जिमि पाजुपिन्त, यःसा यःधा, छला मखु, म्हगसे म्हनीगु खः, के यही हो प्रेमको अर्थ म्यूजिक भिडियो खःसा चिहाः संकिपा व टेलिसिरियलय् खोताबजि, माफ गर्नुस म्याडम, स्वापू, लिभिंग टुगेडर, हाकूगु पौ, ध्वः छध्वः रेखां क्यूगु, थः कतः कतः थः ।

७) नेवाः म्यूजिक भिडियो व संकिपा ख्यः थौंकन्हय् गथे जुयाच्वंगु दु रु नेवाः ख्यःया म्यूजिक भिडियो व संकिपा उत्कृष्ट मजू धाइ, छाय् रु छिगु विचालय् ?

म्यूजिक भिडियो धा, संकिपा धा, थौंकन्हय् न्हापा न्हापा निर्माण याइगु सिबें यक्व यक्व हे बांलानाः वयाच्वंगु दु । भविष्य अझ नं बांलाइगु आस दु । खास जि थ्व ख्यलय् यक्व पुलांम्ह ला मखु, अथे जुयाः जितः ला गुलि नं निर्माण जुयाच्वंगु दु, बांलाः हे ताः ।

८) जीवन व अभिनय ख्यःयात तुलना यायेबलय्, छिं गुकथं यानादी ?

चरित्र कथंया यथार्थ अभिनय हे बास्तविक जिवन्त अभिनय खःसा जीवन धैगु रंगमचथें हे खः । जि थ्वहे यथार्थताय् दुने च्वनाः अभिनय व जीवनयात कःघानाः क्यामेरा न्ह्यःने थःतः तंकाः पर्दाया बाखनय् दुबिनेगु यानाच्वना ।

९) छिगु जीवनय् ल्वःमंके मफूगु सुख व दुःखया क्षण छु खः ?

जिगु जीवनय् ल्वःमंके मफूगु सुखया क्षण धैगु गुबले जिमि मां जिगु ज्या खनाः लसता प्वंकाः जितः स्याबासी बियादी, व जिगु सुखया क्षण जुयाच्वनी । जिगु दुःखया क्षण धैगु जि १५ दँ दुबलय् डान्स टिचर जुइगु आज्जु तयाः किपुलीनिसें येँया भिमसेनगोलातक वनाः डान्स सयेकः वना । तर डान्स कोर्स पूवंके मफुत, थ्वहे दुःखया क्षण खः ।  

१०) कलाकारिता ख्यलं जीवन निर्वाह यायेगु लँपु चूलाः कि मलाः ?

धात्थें धायेगु खःसा आःतक ला थ्व कलाकारिता ख्यलं जीवन निर्वाह यायेगु लँपु चूलागु मदुनि । तर, थथेहे बांलानाm वनधाःसा पक्का नं चूलाइ धकाः भलसा कयाच्वना ।

११) थ्व ख्यलय् ग्लायमर नं माः धाइ, छिं न्ह्यब्वयागु दु थें च्वं कि मच्वं ?

हा..हा..हा.. उम्म् माः । आःतक उज्वःगु ग्लायमर हे न्ह्यब्वयेमाःगु कथंया बाखंया प्याखं झीगु नेवाः ख्यलय् निर्माण जूगु मदुनिथें च्वं ।

१२) माया मतिनाया परिभाषा बिइमाल धाःसा छिं गुकथं बियादी ?

निःस्वार्थ भावनां छम्हं मेम्हेसित साथ बिइगु व ग्वाहालि यायेगु हे सच्चा माया मतिना खः ।

१३) कन्हेया लक्ष्य ?

जिगु लक्ष्य (आज्जु) धैगु हे अभिनययात निरन्तरता बियावनेगु खः । जीवनय् अभिनयपाखें जिगु मांभाय्, जाति, कला संस्कृति व थःगु देय् लिसें थःत छम्ह बांलाःम्ह कलाकारया रुपं देसं देय् म्हसीका बिइगु हे लक्ष्य खः जिगु ।

१४) खस नेपाली भाषाया म्यूजिक भिडियो व संकिपाय् छि खनेमदुथें च्वं, छाय् ?

खस भाषाय् नं दु । तर, म्यूजिक भिडियो व टेलिभिजन सिरियल जक का ।

१५) थ्व ख्यलय् छिगु प्रतिस्पर्धीया नां कायेमाल धाःसा सुयागु नां कयादी ?

खास प्रतिस्पर्धा यायेगु रुपं जिं गुबलें सुयात नं सोचेयानागु मदु । जि थःम्हं गुलि बांलाकेफु, उलि हे बांलाक्क कुतः यानाः न्ह्यां वनाच्वनागु दु ।

१६) नेवाः ख्यःया थुगु संकिपा म्यूजिक भिडियो मनोरञ्जन ख्यलय् गुटबन्दी दु धाइ, उकिं नेवाः कलाकारपिनिगु दथुइ हे मनमुटाब दु धाइ, छिं छु धयादी ?

थ्व खँ जिं नं न्यनागु दु । तर जिं भोगेयाये आःतक म्वाःगुलिं खास हे थुकिया विषयस छुं मसिल ।

१७) दकले लिपा छु धयादी ?

नेपालभाषा ख्यलय् आपालं संकिपा लिसें म्यूजिक भिडियो निर्माण जुयाच्वंगु दु । तर थःगु मांभाषाया संकिपा व म्यूजिक भिडियोयात ग्वाहालि यायेगु लिसें शेयर याइपिं मनूत आवश्यक जुयाच्वंगु दु । सुभाय् ।