नेवा: अनलाइन न्युज – निश्चल | नेपाल संवत ११४५ कछलागा पंचमी (मंसीर ५ गते) बुधवाः

येँ,नेपाल राष्ट्र बैंकया गभर्नर महाप्रसाद अधिकारीं नेपाःया नोटय् नेपाल संवत् नं उल्लेख याकेत थम्हं पहल शुरु याना छ्वयेगु खँ कनादीगु दु । थुकिया लागिं आः न्हूगु लटया नोट डिजाइनय् नेपाल संवत् नं छ्ययेके बीत थम्हं निर्देशन बीगु खँ नं वय्कलं कनादिल । 

नेपाःया नोटय् नेपाल संवत् नं उल्लेख याकेत इनाप यासें म्हिगः वंगु नेपाल संवत् न्हूदँ राष्ट्रिय समारोह समिति–११४५ या प्रतिनिधि मण्डललिसे खँ ल्हासें वय्कलं उगु खँ कनादीगु खः । उगु इलय् न्हूदँ समारोह समितिया नायः लिसें पुलांम्ह मन्त्री राजेन्द्र श्रेष्ठं वय्कःयात ज्ञापनपौ लःल्हासें नेपाःया नोटय् नेपाल संवत् नं उल्लेख यायेमाः धकाः थःपिंसं ताःई न्ह्यवंनिसें माग याना वयाच्वनागु खःसा थ्व माग आः वर्तमान गभर्नरया पालय् पूवनी धकाः आशा यानागु खँ कनादिल ।

गभर्नर अधिकारीं न्यातका, झितका व सछि तकाया नोट छपाई प्रक्रियाय् वनेधुंकूगु खँ कँसें आः थ्वहे दँय् छापे याके त्यनागु न्यासः व द्वःछिवंगु नोटय् नेपाल संवत् नं उल्लेख याकेत कुतः यायेगु खँ कनादिल । थुकिया लागिं आः नोट डिजाइन याइबलय् उकी नेपाल संवत् नं तयेकेगु बचं वय्कलं बियादिल । नोट डिजाइन याइबलय् उकी खने दयेक हे छुं परिवर्तन जुयाच्वन धाःसा उकियात मन्त्रिपरिषद्य् यंकाः निर्णय याये मालीगु व सामान्य परिवर्तन जक जूसा राष्ट्र बैंकया बोर्डं जक निर्णय याःसां गाइगु खँ नं गभर्नर अधिकारीं कनादिल । लिसें वय्कलं नोटय् नेपाल संवत् उल्लेख याकेगु छुं समस्याया विषय मजुइगु बिचाः नं तयादिल ।  

न्हूदँ समारोह समितिया नायः श्रेष्ठं यदि मन्त्रिपरिषद् यंके मालीगु अवस्था वल धाःसा अर्थमन्त्रीलिसे थःपिंसं समन्वय यायेगु खँ कनादिल । 

उगु इलय् नेवाः न्ह्यलुवा मल्ल के। सुन्दर, प्रा।डा। नरेशमान वज्राचार्य व डा। पुष्पराज राजकर्णिकारपिंसं नेपाल संवत्यात फुक्क सरकारी दस्तावेजय् दुथ्याकेगु धकाः नेपाल सरकारं निर्णय यायेधुंकूगु कारणं आः नोटय् नं नेपाल संवत् उल्लेख याकेगु छुं समस्याया विषय मजुइगु बिचाः प्वंकादिल । प्रतिनिधि मण्डलय् नेवाः देय् दबूया नायः पवित्र वज्राचार्य लिसें सुरेश किरण, सुजिव वज्राचार्य, ज्योति शाक्य,मचाराजा महर्जन,सिर्जन श्रेष्ठपिं नं दीगु खः । 

Categorized in राष्ट्रिय