नेवा: अनलाइन न्युज | नेपाल संवत ११४४ ञँलागा अस्तमि (२०८१ असोज ९ गते) बुधवाः

नखःचखः लिक्क वयाच्वंसां नं वैदेशिक रोजगारीइ वनीपिं नेपाःमिपिनिगु ल्याखय् म्होजूगु मदु ।

नेपाःमिया मोहनी स्वन्तिथें जाःगु मू नखःचखः लिक्क वयाच्वंगु इलय् थीथी मुलुकय् यानाः ५७ हजार ४ सय ९३ म्ह नेपाःमि पिहाँ वंगु दु । थ्व चालु आर्थिक दँ २०८१–०८२ या भाद्र महिनाय् जक विदेश वंपिं नेपाःमिपिनिगु ल्याः खः ।

वैदेशिक रोजगार विभागया कथं विदेश वंपिंमध्ये ५० हजार ७ सय ७० म्ह मिजं व ६ हजार ७ सय २३ म्ह मिसा जूगु दु । वंगु साउनय् ६० हजार विदेश वंगु खः ।

भाद्र महिनाय् २९ हजार ५ सय २८ म्ह संस्थागत रुपं व ९ हजार २६ म्हेस्यां व्यक्तिगत श्रम स्वीकृति कयाः वैदेशिक रोजगारीइ वंगु विभागं जानकारी ब्यूगु दु ।

अथेहे, जिटुजीपाखें १ हजार ३ सयम्ह विदेश वंगु दु । थ्व न्हूगु व पुलांगु श्रम स्वीकृति कयाः वनीपिं श्रमिकया ल्याः खः ।

दकले अप्वः यूएई वन, मलेसिया वनीपिं म्ह्वः जुल

वैदेशिक रोजगार विभागया सुचं अधिकारीतकं जुयाच्वंम्ह गुरुदत्त सुवेदीया कथं भाद्र महिनाय् दकले अप्वः यूएई वंगु दु । लिपांगु लच्छिइ युएईवंपिं जक १८ हजार ६ सय ५ म्ह नेपाःमि विदेश वंगु दु ।

अथेहे, साउदीइ १० हजार ८ सय ३५, कतारय् ११ हजार २ सय ९१ व कुवेतय् ४ हजार २ सय १५ म्ह श्रमिक वैदेशिक रोजगारीइ वंगु सुचं अधिकारी सुवेदीं जानकारी ब्यूगु दु ।

थुखे, वैदेशिक रोजगारीइ मलेसियाय् वनीपिं श्रमिकय् धाःसा तःधंगु गिरावट वःगु दु ।

साउन महिनाय् मलेसियाय् १ हजार ३ सय ४४ म्ह वैदेशिक रोजगारीइ वंगु दु । थ्व कोभिडलिपा आःतकया हे तःधंगु गिरावट खः । छुं इलय् नेपाःया मू श्रम गन्तव्य जूगु मलेसियाय् भाद्र महिनाय् १ हजार १ सय ९३ म्ह श्रमिक वंगु दु ।

न्ह्यःया आर्थिक दँया भाद्र महिनाय् ८ हजार १ सय ६३ म्ह श्रमिक रोजगारीया नितिं मलेसियाय् वंगु खः । वंगु मार्च महिनाय् मलेसियां आप्रवासी श्रमिक यंकेगुलि कटौती याःबलय् थ्व ल्याखय् म्हो जूगु विभागया सुचं अधिकारी सुवेदीं धाःगु दु ।

भाद्र महिनाय् युरोपय् वंपिं नेपाःमिया ल्याः नं अप्वः जूगु खनेदु । विभागया कथं रोमानियाय् दकले अप्वः श्रमिक वंगु दु ।

भाद्र महिनाय् युरोप राष्ट्र रोमानियाय् १ हजार ८ सय ८८ म्ह वैदेशिन रोजगारीइ वंगु दु । अथेहे, क्रोएसियाय् ७ सय ९, साइप्रसय् ६ सय १२, माल्टाय् २ सय ८२ म्ह वंगु विभागया तथ्यांक दु ।

अथेहे, जापानय् १ हजार ५ सय ५६ म्ह व दक्षिण कोरियाय् १ हजार १ सय ६ म्ह रोजगारीया नितिं वंगु दु ।

छु जिल्लापाखें गुलि वन ?

भाद्र महिनाय् दकले अप्वः धनुषापाखें वैदेशिक रोजगारीइ वंगु दु । भाद्र महिनाय् धनुषापाखें ३ हजार ३ सय ६० म्ह, सिराहापाखें २ हजार ६ सय ४४ म्ह, झापापाखें २ हजार ५ सय ७५ म्ह, मोरङपाखें २ हजार ४ सयम्ह, महोत्तरीपाखें २ हजार ३ सय ६० म्ह, सुनसरीपाखें २ हजार ५७ म्ह वैदेशिक रोजगारीइ वंगु दु ।

१३ हजार अदक्ष श्रमिक विदेश वन

नेपाःपाखें भाद्र महिनाय् विदेश वंपिं श्रमिकमध्ये १३ हजार १ सय ७१ म्ह अदक्ष श्रमिक दु । विभागया कथं भाद्र महिनाय् विदेश वंपिंमध्ये ३७ हजार ७ सय ८३ म्ह श्रमिक दक्षपिं व अर्ध दक्ष ६ हजार १ सय ७५ म्ह विदेश वंगु दु ।

अथेहे, व्यवसायिक दक्ष शिप दुपिं ३ सय ९ म्ह वंगु दुसा ५५ म्ह उच्च दक्ष श्रमिकपिं विदेश वंगु दु ।

नखःचखःया इलय् देय् त्वःतूगु दुःखद्

विभागया सुचं अधिकारी गुरुदत्त सुवेदीं नखःचखः लिक्क वयाच्वंसां नं रोजगारीया नितिं विदेश वनीपिनिगु ल्याखय् छुं म्हो मजूगु धाःगु दु । मुलुक दुने रोजगार मदयाः युवापिं विदेश वनेमाःगु अवस्थाय् हिउपाः मवःगु सुवेदीया धापू दु ।

समाजशास्त्री माधव अधिकारीं नखःचखःया इलय् विदेश वंगु अतिकं दुःखद् जूगु धाःगु दु । वं धाःगु दु, “नखःचखया इलय् तापाक्क वनाच्वंपिं नेपाःमिपिं नं छेँय् लिहाँ वइगु, थःथिति व छेँजःलिसे ई छ्यायेगु ई खः । तर, भविष्यया नितिं नखःचखःया हे इलय् छेँजःनाप तापानाः विदेश वनेमाःगु अवस्था अतिकं चिन्ताया विषय खः ।”

मुलुकय् रोजगारीया अवस्था मदुबलय् युवापिन्त आशा ब्वलंके मफयाः थुज्वःगु अवस्था वःगु अधिकारीं धाःगु दु ।

Categorized in लजगाः