धम्मावती गुरुमां स्वास्थ्य अक्षय कोष नीस्वनीगु
![](https://www.newaonlinenews.com/sites/default/files/dhammawati%20guruma%20chhetrapati.jpg)
नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व चतुर्थी (२०८१ असार २६ गते) बुधवाः
नांजाःम्ह थेरवाद बुद्धधर्मया गुरुमां धम्मावती गुरुमांया नामं स्वास्थ्य अक्षय कोष नीस्वनीगु जूगु दु ।
धर्मकीर्ति विहारलिसें उगु विहारया शाखा विहारय् च्वनाबिज्याइपिं गुरुमांपिन्त निःशुल्क स्वास्थ्य उपलब्ध याकेगु नितिं थथे अक्षय कोष नीस्वनेत्यगु खः ।
धर्मकीर्ति विहारं ब्यूगु जानकारी कथं थथे अक्षय कोष नीस्वनाः निःशुल्क स्वास्थ्य उपलब्ध याकेगु नितिं क्षेत्रपाति निःशुल्क चिकित्सालयया नायः डा.मनोजमान श्रेष्ठनाप सहलह जुयाच्वंगु दु।
धर्मकीर्ति विहारपाखें झिगू लख तका व थीथी उपासक व उपासिकापिनिगु पाखें नं आर्थिक ग्वाहालि मुंकाः थथे अक्षय कोष नीस्वनेत्यंगु खःसा अक्षय कोष नीस्वनेधुंकाः क्षेत्रपाति निःशुल्क चिकित्सालयपाखें वा व अप्रेशन बाहेक मेगु सकतां स्वास्थ्य सेवा गुरुमांपिन्त आजिवन निःशुल्क यायेगु तयारी याःगु दु ।
चिकित्सालयया नायः डा.श्रेष्ठं धम्मवाती गुरुमां स्वास्थ्य अक्षय कोषय् फुफुपिन्सं आर्थिक ग्वाहालि यायेत इनाप नं याःगु दु । थुगु अक्षय कोषया घोषणा थ्वहे वइगु आइतवाः सुथसिया ८ ता इलय् धर्मकीर्ति विहारय् जुइगु छगू ज्याझ्वलय् याइगु जूगु दु ।
Categorized in स्थानिय-समाज