नेवा: अनलाइन न्युज | नेपाल संवत ११४५ कछलागा पंचमी (मंसीर ५ गते) बुधवाः

विद्युतीय कारोवार मुद्दाय् गिरफ्तारीइ लाःम्ह दुर्गा प्रसाईंयात न्यान्हु हिरासतय् तयाः अनुसन्धान यायेत अदालतं अनुमति ब्यूगु दु ।

येँ जिल्ला अदालतं दुर्गा प्रसाईंयात न्यान्हु हिरासतय् तयाः अनुसन्धान यायेत अनुमति ब्यूगु खः ।

मंगलवाः न्हिनय् ख्वपया कमेरोटारय् च्वंगु दुर्गा प्रसाईंया निजी निवासपाखें गिरफ्तारीइ लाःम्ह वयात म्याद थपया नितिं थौं बुधवाः अदालत पेस याःगु खः ।

सीआईबीं मंगलवाः दुर्गा प्रसाईंया स्वास्थ्य परीक्षण यानाः साइबर ब्यूरोयात जिम्मा ब्यूगु खः । प्रसाईं नं प्रधानमन्त्री केपी शर्मा ओलीयात स्वानाः सामाजिक संजालपाखें अफवाह ब्वलंकूगु द्वपं दु । प्रसाईंविरुद्ध साइबर अपराधय् अनुसन्धान न्ह्यःने वंगु दु । प्रसाईंविरुद्ध किर्ते लिसें मेमेगु कसुरय् नं अनुसन्धान जुइगु जूगु दु ।

प्रसाई नं कम्बोडियाय् च्वंगु टेलिकम एक्जियाटा कम्पनीइ प्रधानमन्त्री केपी शर्मा ओलीया २१ करोड अमेरिकी डलर लगानी दूगु धासें थीथी भ्वँ तयाः भिडियोसार्वजनिक याःगु खः ।

प्रसाईंयात न्हापानिसें हे थीथी अपराधय् अनुसन्धान जुयाच्वंगु खः । विवादास्पद मेडिकल व्यवसायी प्रसाईं थ्वसिबें न्ह्यः असोज ६ गते गिरफ्तार याःगु खः ।

रास्वपाया छम्ह केन्द्रीय दुजः नं ब्यूगु जाहेरी कथं दुर्गा प्रसाईंविरुद्ध साइबर अपराधसम्बन्धी मुद्दा येँ जिल्ला अदालतय् विचाराधीन दु । उगु मुद्दाय् दुर्गा प्रसाईं १ लख तका दां धरौटी तयाः थुनापाखें मुक्त जूगु खः ।

Categorized in दुर्घटना-अपराध