केदार सितु
उखुन्हु स्वामी तोलारामदासया प्रवचन जूबलय् मनूत गयाय्सकं धुफ्वः दनावःगु !
तयांतयेथाय् मदयेक मनूत वःबलय् ला छकः ग्वसाः ग्वःपिं नं इइपन ।
मनूत लँय्लँय् थ्यंक दनाः दनाः न्यनाच्वंपिं !
घौ बाघौ तक ला लँ हे थप्प जुल ।
मनूतय्के धर्म अप्वयावःगु हे खः ला धयाथें मनूतय्गु समुद्र हे मुन ।
स्वस्थानिइ थ्व देयात धर्मभूमि, पुण्यभूमि धयातःगु आः वास्तवय् हे प्रतीत जूथें जूगु खः अबलय् ।
मनूतय्गु हाप्वः खनाः स्वामी तोलारामदास नं चंचंधयावल ।
प्रवचन ब्यूम्हसिया ख्वाः मुसुकाः ।
‘थ्व थाय् सलंसः दँ न्ह्योनिसें पुण्यभूमि जुयावयाच्वंगु दु, धर्मया उद्भव हे थनं जूगु खः । थ्व थासय् जन्म जुयेगु धयागु हे पूर्वजन्मया पुण्यलाभया फल खः ।’
स्वामी तोलारामदासया प्रवचन न्ह्यात ।
खँग्वः पतिं लापा, खँत्वाः पतिं लापा, ल्हाःया हावभाव पतिं लापा !
ओहो ! मनूत गुलि ज्ञानी जुयावःगु ! मनूत गुलि गुणी जुयावःगु ! मनूत गुलि धार्मिक व आध्यात्मिक  जुयावःगु !
स्वामीया प्रत्येक खँग्वलं, प्रत्येक खँत्वाकं मनूतय्त झुमिं यंकाच्वन ।
स्वामीया प्रत्येक खँग्वलय्, प्रत्येक खँत्वाकय् मनूत झुमिं वनाच्वन ।
म्हासुगु वस्त्रय् भक्तजनत मानौं पूर्णरुपं इच्छामुक्त, क्लेशमुक्त, रागमुक्त, कामक्रोधलोभमोहमुक्त खनेदु ।
म्हासुगु वस्त्रया परावर्तनं अनया थाय् हे मोक्षभूमि, तपोभूमि खनेदयाच्वन ।
मिसा, मिजं, मचा, ल्याय्म्हल्यासे व बुह्राबुह्रि तकंया सहभागीता दुगु उगु प्रवचन कार्यक्रम ताईतक हे लुमनाच्वनी कथं भव्य जुल ।
ग्वसाःग्वःपिं दंग ! स्वामी झन् दंग !
□
न्यान्हुया योग शिविरं न्याद्वलं मयाक योगीत उत्पादन जुल ।
भारतं वःम्ह योगगुरुया प्रत्यक्ष नेतृत्वय् आयोजना जूगु उगु योग शिविरय् मनूतय्सं सलंसः दां पुलाः सहभागी जुइदयाः थःपिन्त भाग्यमानी ताय्काच्वन ।
क्यान्सरंनिसें स्येखनं तक पीडितपिं मनूत शिविरय् ब्वति कयाः थःपिनिगु ल्वचं मुक्ति दइगु खँय् धुक्क खनेदु ।
न्यान्हुया दुने हे पुलिस्याःगु लंपिं नं पिहांवल, छ्यों स्याःगु लंपिं नं पिहांवल, हाइ ब्लड प्रेशर लो जुयावंपिं नं पिहांवल, सुगर लो जुयावंपिं नं खनेदयावल .................................................
योग शिविर लिपा तरकारि बजारं लौका गायब जुल ।
बजारय् हाकनं पिहांवःबलय् लौकां ससम्मान रिइन्ट्री काल । 
□
दे तन्त्र व मन्त्रभूमि नं खः ।
छगू इलय् तन्त्रया बलं गज्याःगज्याःगु संकटं पार जुयावयेधुंकूपिं तन्त्रगुरुपिनिगु गौरवगाथां जाः थनया थ्यासपूm, लँुसपूm, पौभाःत ।
सिमाक्वय् द्यनाः तुतिं सिमाकचा क्वछुकाः च्वलय्चायात सिमाहः नकाः च्वलय् जइपिं तान्त्रिकंनिसें जनीयात तापू दय्काः थःगु ज्यान बचेयानावःपिं तान्त्रिक तकयागु दे धकाः नां जाः ।
देसय् जक मखु देसं पिने पिने तकं थुपिं तान्त्रिकतय्गु बाखं न्यं ।
थ्व हे तन्त्रगुरुतय्गु देयापिं धकाः न्हाय् म्वाकावयाच्वंपिं थनया जनतां हाकनं पुर्खाया थ्व गौरवयात म्वाकातयेत मां–बाःतय्थाय् सुथंनिसें झ्वःछूवनेगु ज्याय् तीब्रता हःगु दु ।
उखे मांयाथाय् प्वाःस्याःपिंनिसें मुद्दा प्वाँय्प्वाँय् घानाच्वंपिं तकयागु हूल खनेदु सा थुखे बाबायाथाय् भाःत स्यंपिंनिसें माजुं सह मयाःपिं तकयागु सहभागिता खनेदु ।
ग्वःम्हेसिया मुद्दा ला मांयाथाय् वयाः वयाः हे जक त्यात हं ! अले ग्वःम्हेसिया भाःतपिं बाबायाथाय् वयाः भिनावल हं, माजुं सह मयाःपिन्त नं आः माजुं मुलय् तये ला छ्यनय् तये ला याइगु हं !
उकिं आः मां व बाबापिनिगु ततःखागु न्हून्हूगु बिल्डिङ्गया पिने सुथंनिसें बहनिइ तक हे मनूत गनं गनंनिसें वयाः झ्वःछुयाच्वनिगु ।
मांया ख्वाः छकः जक स्वयेत नं द्वलंद्वः फुकीपिं नं उत्तिकं खनेदयावल, बाबाया तुति छकः जक थीत नं सलंसः प्वंकीपिं नं उत्तिकं खनेदयावल । 
□
छगू करोड (आः झण्डै स्वंगू करोड) मनूतय् दथुइ स्वीस्वंगू करोड द्यो दुगु देया मनूत धर्मात्मा जुइगु ला स्वाभाविक हे जुल ।
छगू इलय् झिझांमिझां दनेधुंकूगु द्यो–देगःत नं आः पुनरोद्धार जुयाः गुलजार जुइधुंकल । देगः तछ्यानाः बुयावयाच्वंगु वंगलःसिमा ल्यहेंथनाछ्वयेधुंकल ।
बुह्राबुह्रित जक मखु ल्याय्म्हल्यासेचात तकं आः द्यो–देगःया जःखः च्वनाः घन्टन्काघन्टन् गफ मुइकः वइगु जुल ! सुथ व चाया तकं ल्याः मतयेधुंकल थथे द्योदेगःया जःखः भुंवइपिंसं ।
द्यो व देगःया मान ला च्वंगु हे जुल थुकिं, नापनापं मनूतय् धर्मलाभया पुण्यज्या नं सम्पन्न जुयाच्वंगु नं जु हे जुल ।
धर्मरक्षाया लागि मनूत थुलि जागृत जूगु सखे थ्व अभूतपूर्व धायेमाः ।
न्हिच्छि मालपोत व अदालतया लागाय् कर्पिनिगु तनाच्वंगु जग्गात मामां त्यानुगु म्हयात दिकः वइपिंनिसें अफिसय् फाइलत पुत्तुपुइकाः उसुगु न्हाय्यात शान्त्वना बीत वइपिं व स्कुल कलेजया वसतय् थःपिनिगु ब्वनेज्या सम्पन्न यायेत वइपिं मचा ल्याय्म्हल्यासेचांनिसें न्हिच्छिया बनेज्यां लबः वःगु दांया एकांश प्रभुचरणय् सभक्ति समर्पण याःवइपिं भ्वरिखाःपिं बंजाःत तकं ग्वाःग्वाः हे खनेदु ।
छुं दँ न्ह्योतिनि जक सुंसां व झिझांमिझांदंगु देगलय् आः नगरांनिसें शंख तकया अमृतध्वनि तायेदत ।
आखिर थ्व दे धर्मरक्षित दे न खत !
□
उखुन्हु बौम्ह स्वामी तोलारामदासया प्रवचन न्यनावःखुन्हु म्ह्याय्म्हसिया देया नुगःचुइ दनाच्वंगु छगू फाइभ स्टार होटलय् फेशन शोया धेंधेंबल्लाः जूगु ।
फेशन शोनं म्ह्याय्म्हं छगू लाख तका व गोल्ड मेडल नं ज्वनावल ।
बौम्हं थौं स्वामीयाथाय् वनागुया प्रसाद हे भाःपिल म्ह्याय्या सिरपा ।
कन्हेखुन्हु पत्रपत्रिकाय् पिहांवःगु म्ह्याय्या सिरपा त्याकुगु बच्छिं मल्याक पचिनांगागु फोटों मांबौ झन् हे दंगदास जुल ।
बहनिइ टि. भी.इ रिप्ले यानाः क्यंगुं फेशन शोया लाइभ शोलय् म्हय् बच्छि जक प्यपुनाच्वंगु वसतय् परेड म्हिताच्वंम्ह म्ह्याय्यात खनाः मांबौया बँय् पलाः मलाः ।
थः म्ह्याय्प्रति नुगःया कपिं कपिं गौरव दनावल मांबौया ।
म्ह्याचं थःपिनिगु न्हाय् तःगु अनुभव यात ।
□
देया नुगःचुइ नुगःचुइ धस्वानाच्वंगु डान्सबारं दे गाक्कं आधुनिकताय् न्ह्यांवनेधुंकूगु दसिपौ न्ह्यब्वयाच्वंगु दु ।
शावर डान्स, पूल डान्स, पोल डान्स, डिस्कोथेक यावतं देयात व जनतायात नं लस भेगास, पेरिस, लण्डनया स्ट्याण्डर्डय् थ्यंकाच्वंगु दु ।
मचा ल्याय्म्हचापिंनिसें बाज्यः वनेधुंकूपिं तकयागु उपस्थितिं वातावरण दिगिदिगि क्वानाच्वंगु दु ।
राजधानीया गुलिखे गल्लित थज्याःगु डान्सबारतय्सं चच्छि चच्छि गुलजार जुयावयाच्वंगु दु ।
दे आधुनिकताया लँय् बांलाक हे न्ह्यज्यायेधुंकल ।
विदेशय् वनावःपिंसं थःपिनिगु देया प्रगति खनाः सन्तोष कयाच्वंगु दु ।
सन्तोष थ्व हुनिं नं कयाच्वंगु दु, देसय् नं कमसेकम मनोरंजन यायेगु अत्याधुनिक थाय् ला दत !
□
उखुन्हु काजिरत्नयात क्यासिनोया गाडिं छेँथ्यंक काःवल धकाः त्वालय् बय्बय् हे जुल ।
निन्हुप्यन्हु ला काजिरत्नया तुतिं बँय् पलाः मतः । कलाःम्हसिया नं पिने वइबलय् ख्वाः मुसुमुसु काः ।
अथे ला तःकः हे काःवयेधुंकल काजिरत्नयात क्यासिनोया गाडिं ! उखुन्हु धाःसा त्वालय् यक्वसिनं हे खंगु जुयाच्वन ।
गाडिं काःवक्वधां काजिरत्नया तुतिं बँय् पलाः मतः ।
थुथाय् काजिरत्नया कमाइनं सर्गः थियाच्वंगु ! दां ला गनं वः गनं वः जुइक हे दुहांवःगु वलं !
विदेशं सामानया अर्डर नं लकेहनेमफयेक हे वयाच्वंगु दु !
थुलिमछि दां गुबलय् जक फुकेगु धयाथें जुयाः मखा जुइ काजिरत्नया पलाः क्यासिनोपाखे न्ह्याःगु !
द्यवं बीलात कि ह्वगंत्वाःचा नं जायेक बीयः धाःथें काजिरत्नया क्यासिनोय् नं दिगुद्यो बल्लानाच्वन ।
काजिरत्न आः क्यासिनोया स्थायी मेम्बर हे जुइधुंकल ।
गुबलें गुबलें ला क्यासिनों हे नं छेँथ्यंक काय्केछ्वयाहइ काजिरत्नयात । गुबलें गुबलें काजिरत्न थःम्हं हे सःती क्यासिनोया गाडियात ।
क्यासिनों लिहां वइबलय् बाचा जायेधुंकी । क्यासिनों लिहां वइबलय् नं काजिरत्नयात क्यासिनोया गाडिं हे तःवइ ।
गाडिं कुहां वइबलय् धाःसा काजिरत्नया पलाः थासय् लानाच्वनिमखु ।
काजिरत्नं धाःकथं क्यासिनोया ग्राहकतय् त्वनेफक्वं ज्यू हं । मनूत नयेत व त्वनेत जक जूसां छम्हूचा धिबा ज्वनाः म्हितः वइपिं दु हं ।
तर काजिरत्न अथे इज्जत वांछ्वयाजुइम्ह मखु हं । लाःसा न्हिच्छिया कमाइलं मगानाः सेफ चाय्काः नं धिबा प्वःचिनावं व । 
□
बुद्धंनिसें बुद्धुतकं जुइ मनूत । थ्व थःथःगु स्वतन्त्रताया खँ खः ।
थःथःकथंया जीवनयापन यायेत मनूत निर्बन्ध !
मनूत थःत छिंकथं म्वाइगु खः ÷ थःत यःकथं म्वाइगु खः ।
मनूत स्वतन्त्रं म्वाइ, अले थःगु नियति थःम्हं हे भोगे याइ ।
आखिर जिन्दगीया अस्तित्व धयागु नं थ्व हे मखा ! □

ने. सं. ११३२ थिंलाथ्व यःमरि पुन्हि ÷ २०६८ मंसीर २४