ट्राफिक कारवाहीय लाःपिन्त प्रहरीं स्वयंसेवक दयेकाः सतकय् खटेयात
![](https://www.newaonlinenews.com/sites/default/files/t%20p.jpg)
नेवा: अनलाइन न्युज – ललेन्द्र शाक्य | नेपाल संवत ११४४ खस्थि (२०८१ जेष्ठ १६ गते) बुधवाः
ट्राफिक नियम उल्लंघन याःबलय् कारवाहीस लाःपिन्त प्रहरीं स्वयंसेवकया रुपं सवारी व्यवस्थापनय् खटेयायेगु ज्या न्ह्याकूगु दु ।
उपत्यका ट्राफिक प्रहरी ज्याकुथिं थौं बुधवाःनिसें सचेतना कक्षा कायेमाःगु कथंया कारवाहीस लाःपिन्त छघौ ट्राफिक स्वयंसेवया रुपं खटेयायेगु ज्या न्ह्याकूगु एसएसपी जीवन श्रेष्ठं जानकारी ब्यूगु दु ।
एसएसपी श्रेष्ठं धाःगु दु, “गृहमन्त्रालयपाखें वःगु निर्देशन कथं थौं बुधवाःनिसें हे कार्यान्वयनय् वनेधुनागु दु । सुथय् ९ ता ईनिसें सनिलया ५ ता ईतक वय्कःपिन्सं सतकय् ट्राफिक व्यवस्थापन यायेगु ज्या यानादी । सिंहदरबार गेट, माइतीघर, भद्रकाली, पुतलीसतक, पद्मोदय मोड, सातदोबाटो चोक लिसेंया थासय् वय्कःपिं खटेजुयादीगु दु ।”
थौं बुधवाः जक ६०४ म्हेस्यां उपत्यकाया थीथी चोकय् स्वयंसेवकया रुपं ट्राफिक व्यवस्थापन याःगु दु । उपप्रधान लिसें गृहमन्त्री रवि लामिछानें मंगलवाः फेसबुकलय् स्ट्याटस च्वयाः मज्यू जूगु इलय् प्यन्हुतक मिसा ट्राफिक प्रहरीं ज्या यायेम्वाःगु घोषणा याःगु खः । उकिया पलेसा मापसे लिसेंया कारवाहीस लाःपिन्त ट्राफिक स्वयंसेवकया रुपं खटेयायेगु वं धाःगु खः ।
उपत्यका ट्राफिक प्रहरी महाशाखाया एसएसपी जीवन श्रेष्ठं धाःगु दु,“उकिया कार्यान्वयन स्वरुप सचेतना कक्षा कायेत वःपिन्त सतकय् छ्वयागु दु । ज्याकुथिइ छुं ई सचेतना सम्बन्धी कक्षा कायेधुंकाः वय्कःपिं फ्लोरिेसेन्ट ज्याकेट फिनाः खटेजुयादीगु खः ।”
हरेक समूहया नापनापं छम्ह प्रशिक्षित ट्राफिक प्रहरी दइगु श्रेष्ठं धाःगु दु । श्रेष्ठं धाःगु दु, “वय्कःपिन्सं आः सतकय् हे दनाः थःगु सुरक्षा नं स्वयादी व ट्राफिक प्रहरीयात नं ग्वाहालि यानादी ।”
उपत्यकाय् १८ सय ट्राफिक प्रहरी सतक व्यवस्थापनय् खटेजुयाच्वंगु दु । उपिंमध्ये कम्ती नं स्वसःम्ह मिसा प्रहरी दूगु उपत्यका ट्राफिक प्रहरी ज्याकुथिया तथ्यांक दु ।
ट्राफिक प्रहरीया तथ्यांक कथं, आः न्हिथं कम्ती नं स्वद्वःम्ह सवारी चालक ट्राफिक प्रहरीया कारवाहीस लाइगु जुयाच्वंगु दु । उपिंमध्ये सचेतना कक्षा कायेमाःपिं न्हिथं खुसःम्ह जुइगु ट्राफिक प्रहरीया अधिकृतपिन्सं धाःगु दु ।
Categorized in बजाः