चीनय् सुनमाया बुढां त्याकल ट्रेल रेसया उपाधि
नेवा: अनलाइन न्युज | नेपाल संवत ११४४ कौलागा चौथी (२०८१ कार्तिक ५ गते) सोमवाः
नेपाली अल्ट्रा धावक सुनमाया बुढां चीनय् जूगु अल्ट्रा ट्रेल रेसय् कीर्तिमानी ईलिसें उपाधि त्याकूगु दु ।
सुनमायां शनिवाः जूगु अल्ट्रा ट्रेल निन्घाई बाई युटिएमबी रेस कीर्तिमानी ई पिकासें त्याकूगु खः ।
सुनमायां ५ घौ ४०ः०३ मिनेटय् निर्धारित ६० किलोमिटर दूरी पूवंकूगु खः ।
सुनमायां कोर्स रेकर्ड लिसें उपाधि त्याकेधुंकाः थःम्हं रेस अतिकं इन्जोए यानागु प्रतिक्रिया ब्यूगु खः ।
सुनमाया बुढां धाःगु दु, “अतिकं बांलात । ट्रेल अमेजिङ जुल । जिं रेस अतिकं इन्जोए याना । आपालं समर्थकपिं चियर यानाच्वंगु खः । जिके अतिकं लसता पिज्वयाच्वंगु दु ।”
लियांल्यू लाःम्ह इस्टर सिलाङं ६ घौ ५ः३७ मिनेटय् निर्धारित दूरी पूवंकूगु खः । अथेहे, रुक्षफाङ चोउ लियांल्यू लाःगु खः ।
लिपांगु इलय् सुनमाया बुढां मदिक्क अन्तर्राष्ट्रिय ट्रेल रेसय् ब्वति कयाः वयाच्वंगु दु । सुनमायां वंगु चैत्रय् चीनय् हे जूगु गोल्डेन कोस्ट ट्रेल रेसया उपाधि त्याकूगु खः ।
अथेहे, सुनमायां युरोपया थीथी राष्ट्रय् वनाः नं ट्रेल रेसय् ब्वति काःगु दु ।
Categorized in कासा