–सञ्जयराज शर्मा / असं, येँ

मस्यु छु ‘...... क्वबियाः लायकूया चिन्ता
कायेमते’ धाइपिन्त
छम्ह जीवित लिसः खः—
गणेशमान !

‘जि रैति मखु—
थ्व देय्या नागरिक खः !’
धाइपिनिगु नितिं
बल्लाःम्ह तिबः खः—
गणेशमान !

‘गणेश’ अर्थात्
गण–नायक हे जुयाः
थःगु जीवन न्ह्याकल
जातिया जक मखु
मुक्कं नेपाः देय्या
मान तयाः जीवन फुकल
उकिं ला छ—
गणेशमान जुल
सही अर्थय्
गणेशमान धाःगु जुल ।।

अन्यायया न्ह्यःने
छ्यं क्वछुके मफुम्ह
अत्याचारीपिन्सं क्वःथले मफुम्ह
जीवन ज्वःछि
सत्य, न्याय व समानताया लागिं
सगरमाथा थें
अटल जुयाः
छ दनाः
अत्याचारीया शासन हे थुनाः बिल
उकिं ला छन्त—
जन ‘लौह पुरुष’या उपमा बिल
पूर्वाग्रह मतःसे धाये—
छ लौह पुरुष खः
छ लौह पुरुष खः ।।

सत्य, न्याय व समानताया
निम्तिं जुइगु
प्रत्येक युगया
हरेक युद्धय्
छ प्रणेता खः
जिमिगु निंतिं—
छ सर्वमान्य नेता खः ।।

जिं न्यना
छंगु मेगु नं नां दु !
छेँया जः, अले पासापिन्सं
छन्त ‘हिराकाजी’ नं धाइ !
मुक्कं खिउँ युगय्
छ— हिराथें थिनाबिल
हिराया जः सहः यायेमफयाः
सच्छि व प्यदँया जहानियाँ राणा शासन
तासया छेँ थें थुनाः
क्रान्तिया छगू अध्याय पूवन ।
अथे तुं—
जनविरोधी पञ्चायती स्वीदँया इलय् ।।

हाकनं छकः छ—
हिरा जुयाः थिनाः बिइवं
०४६ सालय्—
वहे हिराया जःया दुने
बहुदलीय प्रजातन्त्र लुल
छ धात्थें हिरा खः
छ जिमि हिरा खः
हिरा, अर्थात्—
समृद्धिया चिं
देय्या भिं
युगया निं !

छत्वाःचा क्रान्तिया खँ ल्हाये
क्रान्तिया अन्तिम आज्जु
शान्ति हे खः
शान्तिदूत गौतम बुद्ध
जन्म जूगु थ्व नेपाः देय्
छंगु हे योगदानं
हाकनं छकः धन्य जुल !
थुकिया दसू धयागु
छ अलंकृत जुउगु
‘पिस रत्न पुरस्कार’
‘मानवाधिकार पुरस्कार’
अले ‘उं थान्ट शान्ति पुरस्कार’ खः ।।

छंगु—
जन्म शताब्दीया थ्व इलय्
म्हुतुया शोभा कथं मखु
श्रद्धाया आस्थाया सलं
छन्त अनियासें धाये—
जन–जनया मन–मनय्
छ म्वानाच्वंगु दु
छ अमर खः
उकिं लिसा कयाः धाये—
वीर गणेशमान जिन्दावाद !
वीर गणेशमान अमर खः !
जय नेपाल !

सुभाय् ।