२०७८ आश्विन १६, शनिबार ११:२३:५६

सीगु घोषणा याःम्ह मनूयात सुना नं म्वानावःगु खनीबलय् गुज्वःगु महसुस याइ व सोचे याये नं फइमखु । तर, रुसय् डाक्टरपिन्सं सीधुंकूगु घोषणा याःम्ह छम्ह मिसा मुर्दाघरं म्वानाः पिहाँ वःगु दु ।

वास्तवय् सीगु घोषणा यानाः ८१ दँया मिसायात चिकित्सकपिन्सं मुर्दाघरय् तःगु खः । तर, कन्हय् कुन्हु सुथय् उम्ह मिसाया छेँजःपिं सीम्ह कायेत मुर्दाघरय् वंबलय् फुक्क दंग जुल । चच्छि मुर्दाघरय् च्वनाः उम्ह मिसा सुथय् म्वानाः पिहाँ वःगु खः ।

डेली रिपोर्टया कथं मिसाया नां जिनैदा कोनोनोवा खः । जिनैदा लिपांगु छुं दिंनिसें रुसया गोरशेचेन्स्कीया सेन्टर डिष्ट्रिक अस्पतालय् वासः याकाः वयाच्वंम्ह खः । १४ अगष्टय् उम्ह मिसाया सर्जरी जुइधुंकाः वयात डाक्टरपिन्सं सीगु घोषणा याःगु खः । सीम्ह धासें अस्पतालं चान्हसिया १ ता इलय् जिनैदायात मुर्दाघरय् तःगु खः । तर, कन्हय् कुन्हु सुथय् जिनैदा म्वानाः वःगु खनाः अस्पतालया कर्मचारी नं आत्तेजूगु खः ।

अस्पतालया लापरवाहीं बांमलाःगु घटना जूगु धासें प्रमुख डाक्टर निलम्बनय् लाःगु दु । थुकिया लिसें जिनैदाया छेँजःपिन्सं नं अस्पतालविरुद्ध प्रहरीयात उजुरी ब्यूगु दु ।