नेवा: अनलाइन न्युज – ललेन्द्र शाक्य | नेपाल संवत ११४४ दिल्लागा पंचमी (२०८१ श्रावण ११ गते) शुक्रवाः

बिहिवाः चान्हय् १०ः३० ता इलय् येँया वीर अस्पतालय् मदुम्ह किपू नगरपालिकाया मेयर राजकुमार नकर्मीया अन्तिम दाहसंस्कार किपूया ३ वडाय् च्वंगु दीखु दिपय् क्वचाःगु दु ।

अन्तिम संस्कारया झ्वलय् मदुम्ह किपूया मेयर राजकुमार नकर्मीयात नकर्मी समुदायया गुथिया परम्परा कथं पूजाआजा विधि छ्यलाः अन्तिम संस्कार याःगु खःसा मदुम्ह नकःमियात वय्कःया काय् राहुल नकर्मीं थ्यंमथ्यं न्हिनय् १ः३० ता इलय् मिँ तःगु खः ।

किपूया मदुम्ह मेयर राजकुमार नकःमिया अबु राजमान नकर्मी  व मां लक्ष्मी नकःमि खःसा अबु राजमान नकर्मी न्हापा हे मदयेधुंकूगु खःसा मां लक्ष्मी नकर्मी छुं महिना न्ह्यः जक मदुगु खः । किपूया मेयर राजकुमार नकःमि मां मदुगुलिं बर्खि च्वनाच्वंगु खःसा बर्खि च्वनाच्वंगु हे अवस्थाय् वय्कः मदुगु खः ।

वि.सं. २०२२ सालय् किपूया खासिबजारय् जन्म जुयादीम्ह मदुम्ह मेयर राजकुमार नकर्मीया जहान जमुना नकर्मीलिसें म्ह्याय् राज्ञी नकर्मी व काय् राहुल नकर्मी नापनापं प्यम्ह किजापिं दी ।

जलास्यँ (किड्नी) ल्वय् पाखें पीडित नकर्मी ६० दँया उमेरय् बिहिवाः चान्हय् १०ः३० ता इलय् येँया वीर अस्पतालय् मदुगु खः ।
मेयर नकर्मी मदुगुलिं थौं शुक्रवाः किपू नगरपालिका न्यंकं शोक विदा ब्यूगु नगरपालिकाया प्रमुख प्रशासकीय अधिकृत माधव प्रसाद ढकालं विज्ञप्ति सार्वजनिक यानाः जानकारी ब्यूगु खः ।

किपूया मेयर तच्वकं अस्वस्थ जुइधुंकाः वंगु श्रावण १ गते किपू नगरपालिकाया उपप्रमुख शुभलक्ष्मी शाक्य सुनितायात कार्यबाहक मेयर लःल्हाःगु खःसा नकर्मी श्रावण २ गते अस्पताल भर्ना जुयादीगु खः ।

Categorized in स्थानिय-समाज