- सविना महर्जन

Ladies first !

मिजंतय्‌सं धाल कि

जितः तं वइ !

Ladies first!

पितृसतात्मक सत्ताया लुखां पिहांवःगु

सदाशयता व सम्मानं भुनातःगु 

Atom bomb जुयाबी ।

चाकु क्यनाः भुजिं लाय् थें,

मिस्तय्‌त नायुगु सलं ह्ययेकाः 

कमजोर छिपिं धकाः क्यनेत

थनातःगु न्हाय्‌कं जुयाबी । 

Ladies first धयाबीवं

मिसापिं न्हाप लाइगु खः ला ?

न First धयाबीवं जक

First जुइपिं मिसा खः ला ?

अले उमिसं first धया मबीवं

ल्यूने लाइपिं झी खः ला ? 

प्रतिस्पर्धाया  लुखां तिनाः

Ladies first धयाबीवं

प्रतिस्पर्धा याय्‌त ग्याःपिं मिसा जुइ ला ?

न ladies first धाःपिं हे,

प्रतिस्पर्धा खनाः ग्याःपिं खः ला ?

उकिं प्रतिस्पर्धां तापाकेत जक

"छिपिं प्रतिस्पर्धी मखु" धइगु अनुभूत याकेत जक

उमिसं धयाच्वन ला - Ladies first ! 

Ladies first न्यने मात्रं

जित तं वइ !

अले तं वयेवं...

पितृसत्तात्मक समाजया

Sugarcoated थ्व खायुगु खँ

प्रत्येक मिसायात क्यनेगु मन दइ ।

पुरूषहैकमं त्वःतूगु थ्व atom bomb यात

उपिं प्रति हे लक्षित यानाः कुर्केगु मन जुइ ।

सदाशयता व सम्मानं भुनातःगु

ladies first या न्हाय्‌कंयात

चकनाचुर यायेगु मन दइ

अले ,

जित नं धायेवइ -

Please, no ladies first !