नेवा: अनलाइन न्युज | नेपाल संवत ११४५ कछलाथ्व दुतिया (२०८१ कार्तिक १८ ) आइतवाः

यल महानगरपालिका १६ वडा कलाकार समितिया ग्वसालय् नेपाल सम्बत ११४५ न्हूगु द , स्वन्तिया लसताय् जूगु निक्वःगु हुलाप्याखं कासाय् ख्वपया आयोना लाखा न्हाप सिरपा त्याकल । गोल्मढी, ख्वपया आयोनां फाइनल राउण्डय्  झिंप्यम्ह कासामिपिन्त ल्यूने लाकाः शिल्ड, दसिपौलिसें न्येयद्वः तकाः सिरपा त्याकादीगु खः ।कासाय् ल्यू चाकुपात, यलया इभान धाख्वा, लियांल्यू काय्गुननि, यलया लक्कि महर्जन व हःपा न्याखाचुक, यलया उत्पला बज्राचार्यं त्याकादीगु खः । वय्कःपिन्सं छसीकथं शिल्ड, दसिपौलिसें नगद सिरपा ३० द्वः तका, १५ द्व तका व ५ द्व तका त्याकादीगु खः ।यलया कात्तिदबुलिइ जूगु उगु कासाय् वरिष्ठ कलाकार लोकगायक रत्न बेहोशी बज्राचार्ययात “ललितरत्न” उपाधि देछाःसें हंगु खः ।

कला ख्यलय् जीवन पानादीम्ह बज्राचार्ययात ललितपुरया रत्न भाःपा हंगु थुगु ज्याझ्वलय् वयकःयात दोसल्लां न्ययेकाः हनापौ देछाःगु खःसा नगद १५ द्व तका नं देछाःगु खः । थुगु हना दकले न्हापांगु खुसी वरिष्ठ कलाकार मोहनप्रसाद जोशीयात देछाःगु खःसा निक्वःगु खुसी वरिष्ठ कलाकार बज्राचार्ययात देछाःगु खः ।यल महानगरपालिका १६ वडाया अध्यक्ष निर्मलरत्न शाक्यया नायःसुइ व थुगु वडाया कलाकार समितिया कजि सुरजवीर बज्राचार्यया ल्यूनायःसुइ जूगु थुगु ज्याझ्वः जनसंगीत श्रष्टा अमरराज शर्मा राजोपाध्यायको मूपाहां कथं झायादीगु खः  । ज्याझ्वलय् संघीय सांसद प्रेमबहादुर महर्जन, यल महानगरपालिकाया उपप्रमुख मञ्जली शाक्य बज्राचार्य, प्रदेश सांसद रामकृष्ण चित्रकार, १६ वडा सदस्य नापं कार्यपालिका सदस्य बबिता श्रेष्ठ, राष्ट्रिय उपभोक्ता मञ्चया नायः प्रेमलाल महर्जन, नृत्य निर्देशक संघ नेपालया नायः भूवनदास श्रेष्ठ, वरिष्ठ कलाकारपिं नारायणदेवी प्रधान, राधेश्याम प्रधान व नेपालभाषाया न्हापांम्ह सिने पत्रकार विजयरत्न असंबरे लगायतया व्यक्तित्वपिं विशेष पाहाँ कथं झायादीगु खः ।

निर्णायकपिं संजय शर्मा राजोपाध्याय, स्वजन रघुवंशी, श्रृष्टि महर्जन पाखें निर्णायकया भुमिका म्हितुगु थ्व कासाय् ब्वति कयादीपिं नीस्वम्ह कासामि दथुं पिन्सं अडिसन राउण्डय् उत्कृष्ट झिंन्याम्ह  ल्यज्या मिनर्वा शर्मा राजोपाध्याय व राजिप बज्राचार्य जाना यानादीगु खः ।

कलाकार समितिं न्हूपिं कलाकारपिन्त ह्वःता बिइगु या नापनापं समकालिन पुस्ताया सक्रियपिं कलाकारपिन्त दबू व वरिष्ठपिन्त हना देछानाः वयाच्वंगु दुसा येन्यापुन्हि, न्हूदँ, श्रीपञ्चमी, फागु थें जाःगु पर्वय् सांस्कृतिक ज्याझ्वः यानाः वयाच्वंगु दु । नापनापं म्ये कासा, हुलाप्याखं कासा, कलाकार हकहितया नितिं कलाकार मुना, संकिपाया कार्यशाला (वर्कशप), प्रशिक्षण थें जाःगु ज्याझ्वः म्हो बजेटं अति प्रभावकारी जुइक यानाः वयाच्वंगु दु ।न्यादंनिसें सक्रिय थुगु समितिया छ्याञ्जे अनुप शाक्य, दांभरि सलोना बज्राचार्य खःसा दुजःपिं भूपेन्द्र बज्राचार्य, अमर चित्रकार, निल शाक्य, अमोघवीर बज्राचार्य, मोहिद्दिन खान, श्रुयति शाक्य, चनिरा बज्राचार्य व राधिका श्रेष्ठपिं खः ।

Categorized in नेवाः