उपत्यकाब्यापी सतक विस्तार पीडित संघर्ष समितिया कजि सतक विस्तार आन्दोलनया न्ह्यलुवाः सुमन साय्मिं सतक विस्तारयात कयाः आः ‘आन्दोलनया स्वरुप बिइगु तयारी’ दूगु खँ कनादीगु दु ।

भाजु साय्मिं नेवाः अनलाईन न्यूजलिसेया टेलिफोन वार्ताय् थुगु खँ कनादीगु खः ।

भाजु साय्मिया नेतृत्वय् सतक विस्तार आन्दोलनया नितिं न्हूगु कथंया संरचना निर्माण याःगु दु । उगु न्हूगु संरचना कथं थीथी विभाग नीस्वनाः फुक्कसित छथाय् तयेगु नितिं पलाः न्ह्याकूगु दु ।
सुमन साय्मि आः कुण्ठित जुयाच्वंपिं मनूतय्के आश ब्वलना वयाच्वंगु व एकताया नितिं छथाय् च्वनाः न्ह्याः वनेत उत्सुक जुयाच्वंगु दु धयादिसें थःपिनिगु अस्तित्व, सभ्यता व पहिचान म्वाकेगु नितिं उपत्यकाबासीपिं छथाय् च्वनेमाःगु विचाः प्वंकादीगु दु ।

आः नेकपाया स्थिर सरकार वःसां उपत्यकावासी सतक विस्तार पीडितपिन्त स्वइमखु उकिं सकल उपत्यकाबासीपिं न्हापां बल्लायेमाल धकाः धयादिसें राज्यसत्ता यानाच्वंगु ब्यवहार थुइकाः झी थःपिनिगु दायित्व बहन यायेमाःगु विचाः तयादिसें सकल उपत्यकाव्यापी छधी छप्पं जुयाः थःपिनिगु हक अधिकारया नितिं संघर्ष यायेमाल धकाः धयादीगु दु ।

(न्यनादिसँ थन क्लीक यानाः, भाजु सुमन साय्मिलिसे नेवाः अनलाइनन्यूजया सम्पादक ललेन्द्र शाक्यं यानादीगु टेलिफोन वार्ता ।)