असं यिताचपाः छेँया जग स्वन
![](https://www.newaonlinenews.com/sites/default/files/eta%201.jpg)
नेवा: अनलाइन न्युज | नेपाल संवत ११४४ दिल्लाथ्व गुरुपुन्ही (२०८१ श्रावण ६ गते) आइतवाः
येँ महानगरपालिका २७ वडाय् लाःगु नांजाःगु असंत्वाःया यिताचपाः छेँया जग नीस्वंगु दु ।
थौं आइतवाः गुरुपुन्हीया दिं साइत लाकाः थथे जग नीस्वंगु खः ।
असंत्वाःया थकाली पदमकाजी तुलाधर, २७ वडाया वडाध्यक्ष योगेश खड्गीलिसें पुलांपिं वडाध्यक्ष विजय मानन्धर, चिनियाँमान बज्राचार्य, वडा दुजःपिं दिनेश श्रेष्ठ, श्रृष्टि कंसाकार, धर्मप्रजापति, प्रभा परियारपिन्सं जग स्वनादीगु खः ।
येँ महानगरपालिका सम्पदा विभागया परियोजनापाखें पुनःनिर्माण यायेत्यंगु यिता चपाः छेँ निगू करोड स्वीच्यागू लखया बजेट फ्याःगु दुसा दच्छिया दुने थुगु छेँ निर्माण यायेगु ज्या क्वचायेकेगु योजना तःगु दु ।
२७ वडाया वडाध्यक्ष खड्गीं यिताचपाः छेँ असंत्वाःया ऐतिहासिक महत्व दूगु छेँ जूगु खँ कनादिसें थुगु छेँया निर्माण लिपा असंत्वाःया म्हसीका हलिंन्यंकं अझ अप्वइगु भलसा प्वंकादीगु दु ।
Categorized in स्थानिय-समाज