अमेरिकाय् हेलेन धाकुफसं निसःम्हं मल्याक्क मनूत सित
नेवा: अनलाइन न्युज | नेपाल संवत ११४४ कउलाथ्व दुतिया (२०८१ असोज १८ गते ) शुक्रवाः
अमेरिकाया दक्षिण–पश्चिम क्षेत्रय् लाःगु नर्थ क्यारोलिनाय् वःगु धाकुफसं तःधंगु ल्याखय् जनधनया क्षति याःगु दु ।
बीबीसीया कथं हेलेन नांया धाकुफय् वयाः सीपिनिगु ल्याः निसःम्ह सिबें अप्वः थ्यनेधुंकूगु दु । धाकुफसय् लाःपिं थप नागरिकपिनिगु अमेरिकी उद्धारकःमिपिन्सं मालेगु ज्या यानाच्वंगु दु ।
धाकुफय्या हुनिं ज्यान गुमेयाःपिं आपालं नागरिक नर्थ क्यारोलिनायापिं खः । सन् २००५ स वःगु क्याट्रिना नांया धाकुफय् लिपा हेलेन अतिकं घातक धाकुफय् सावित जूगु अमेरिकी संचारमाध्यमं धाःगु दु । क्याट्रिना धाकुफय्या हुनिं १८ सय् सिबें अप्वः मनूत सीगु खः ।
हेलेन धाकुफय् वःगु छवाःया ई वनेधुंकूसां नं सलंसः मनूत आःतकं बेपत्ता जुयाच्वंगुदु व थ्यंमथ्यं ८ लख छेँय् आःतकं विजुली अवरुद्ध जुयाच्वंगु दु ।
नर्थ क्यारोलिनाय् झिद्वलं मल्याक मनूत लःया सुविधापाखें नं तापाःगु दु । समाचार संस्था एपीया कथं सलंसः सतकत बन्द जूगु दु, गुकिं यानाः सहायता हलंज्वलं छ्वयेत नं थाकुयाच्वंगु दु ।
अमेरिकी राष्ट्रपति जो बाइडेनं बिहिवाः धाकुफसं लिच्वः लाःगु क्षेत्रया हवाई भ्रमण याःगु दु ।
लिच्वः लाःगु क्षेत्रया अवलोकनलिपा बाइडेनं लिच्वः लाःपिंलिसे धाःगु दु, “जिं छिकपिन्त खनाच्वनागु दु, न्यनाच्वनागु दु व जि शोकय् नापं दु । लिसें जिं प्रतिज्ञा यायेकि जिपिं छिकपिनिगु साथय् दु ।”
Categorized in अन्तर्राष्ट्रिय