नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व एकादशी (२०८१ श्रावण २ गते) बुधवाः

येँ महानगरपालिकां थौं बुधवाः सुथनिसें येँया २४ वडा लागा जःखः लाःगु न्हूसतकय् लँ चीब्या यानाः पेटी तब्या यायेगु ज्या न्ह्याकूगु दु ।

 उच्च अदालत यलं न्हूसतकया लँ दयेकेगु, भिंकेगु अधिकार स्थानीय निकाययाके दूगु धासें सतक विभागयात अन्तरिम आदेश जारी यायेवं येँ महानगरया मेयर बालेन शाह नं थथे अन्तरिम आदेश जारी याःगु निन्हु लिपा हे थथे लँ चीब्या यानाः पेटी तब्या यायेगु ज्या न्ह्याकूगु खः ।

जुद्ध शालिकंनिसें वंघः पिहाँ वयेगु तकया लँपुया जःखः लँ चीब्या यानाः पेटी तब्या यायेगु ज्या थौं बुधवाः सुथनिसें न्ह्याकाच्वंगु दुसा स्थानीयबासीपिन्सं थथे आकाझाकां हाकनं लँ चीब्या याःवःगुलिं विरोध नं याःगु खः । थथे विरोध याःसां महानगर प्रहरीं अदालतया आदेश कथं ज्या न्ह्याकागु धासें प्रतिवाद याःगु खः ।

न्हूसतकय् लँ चीब्या यानाः पेटी तब्या यायेत्यंगुलिं थुगु ज्यायात कयाः महानगरया स्थानीय जनता व वडाध्यक्षपिन्सं विरोध याःगु खःसा सतक विभागं महानगरपालिका दुने न्हूसतकया लँ दयेकेगु अधिकार मदु धकाः पंगु खः ।

महानगरं थ्वया न्ह्यः  पीच स्यंकाः लँ चीब्या यायेत्यंगु ज्यायात पनाः सतक विभागं पीच याःगु खः । थ्वया लिपा महानगरपालिकां सतक विभाग विरुद्ध मुद्दा दर्ता याःगु खःसा अदालतं उगु मुद्दाय् महानगरया पक्षय् निर्णय ब्यूगु खः ।

Categorized in स्थानिय-समाज