nepal life

“संकिपा ‘जामन गुभाजु’ छगू हाथ्यां जाःगु बाखं खः” –रवि साय्मि

(रवि साय्मि, थौंकन्हय् नेपाःया संकिपा ख्यलय् चर्चाय् वयाच्वंगु नां खः । २०२७ सालया जेठ महिनाय् मां पूर्णकुमारी व अबु धर्मनारायण मानन्धरया कोखं जन्म जुयादीम्ह रवि साय्मिं संकिपा ख्यलय् किपालुमि (क्यामेरा पर्सन–सिनेम्याटोग्राफर) या रुपय् थःगु पलाः न्ह्याकाः वयाच्वंम्ह संकिपाकःमि खः । अष्ट्रेलियाय् जूगु चाल्र्स डार्विन फिल्म फेस्टिभलय् ‘धागो ः द थ्रेड’ नांयागु चिसंकिपाया नितिं ‘बेष्ट सिनेम्याटोग्राफर’या सिरपाः त्याकाः नेपाःया नां तयेत ताःलाःम्ह रवि साय्मि थौंकन्हय् नेपाः देय्या इतिहास कःघानातःगु बाखं ‘जामन गुभाजु’या निर्देशकया रुपय् ज्या यानाः च्वनादीगु दु । थुकथं संकिपा ख्यलय् थःगु बिस्कं म्हसीका न्ह्यब्वयेत ताःलाःम्ह भाजु साय्मिलिसेया खँल्हाबल्हा थन न्ह्यब्वयाच्वना । –सं.)

स्टिल फोटोग्राफीपाखें पलाः न्ह्याकादीम्ह छिसं सिनेम्याटोग्राफी पाखेया पलाः गथे यानाः न्ह्याकादिया ?

जिं सन् १९९० पाखे स्टिल फोटो खिचे यायेगु सुरु याना । जितः विशेष यानाः प्रकृतिया फोटो खिचे याये तसकं यः । च्यादँ झिदँ तकला जिं पहाड, हिमाल, स्वां, सिमाया जक फोटो खिचे याना । अनं लिपातिनि संकिपाया सिनेम्याटोग्राफी पाखे पलाः न्ह्याकागु खः । दकले न्हापां ला म्यूजिक भिडियो खिचेयायेगु ह्वताः चूलात । अनंलिपा टिभी विज्ञापन खिचे याना । अथे जुजुं टेलिसिरियलय् तक थ्यन जिगु पलाः ।

छिं खिचे यानादियागु टेलि सिरियलया नां छक्वः कनादिसँ ले ?

जिं खिचे यानागु टेलि सिरियलय् दीपकराज गिरी व दीपाश्री निरौलापिनिगु टिम जानाः दयेकूगु ‘तितो सत्य’ नं खःसा हस्पिटल, किनारा, भुँइचालोथें जाःगु टिभी सिरियल नं खिचे याना ।

नेपालभाषाया संकिपा नं खिचे यानादियागु दु मखुला ?

दु, जिं खिचे यानागु नेवाः संकिपाय् ‘व मिसा’, ‘टेम्पो चालक’, ‘धम्मावती’, ‘पटाचारा’ व ‘कृषा गौतमी’या नां न्ह्यथने बहःजू ।

थथे छम्ह संकिपा किपालुमिया रुपय् पलाः क्वातुके धुंकूम्ह छिगु संकिपाया निर्देशकया रुपय् गुकथं न्ह्यात ले ?

छम्ह क्यामेरा पर्सनया रुपय् ज्या यायेगु झ्वलय् जितः फिल्म मेकिङ्गया थीथी पक्षयात दुग्यंक स्वयेगु ह्वताः चूलात । अझ उकिसनं गुलिखे म्यूजिक भिडियोया निर्देशन नं यानाबलय् जितः नं फिल्म डिरेक्सन यायेगु मती वःगु खः ।

अले थःगु दकले न्हापांगु निर्देशन हे ‘जामन गुभाजु’ संकिपाथें जाःगु थाकूगु विषय ल्ययागुया मू हुनि छुं दुला कि ?

जिं क्यामेरा पर्सन जुयाः ज्या यानागु फिल्ममध्ये स्वंगूला बौद्ध बाखनय् आधारित दयेकातःगु संकिपा खः । थुकथं नेपाःया धर्म व संस्कृतिलिसे भ्यलेपुनेगु ह्वताः चूलात । अले जतः मेगु ‘कमर्सियल फिल्म’ दयेके मास्ते मवल । बिस्कं महत्वं जाःगुु संकिपा दयेकेगु मती वल । थ्वहे झ्वलय् बाखं मालाः वनाबलय् ‘जामन गुभाजु’ बाखं यल । थुके छगू च्यालेन्ज नं खना । थुके नेपालमण्डलया इतिहास नं दु । अले उगु जमानाया छम्ह तान्त्रिकया जीवनय् वइगु हाथ्याया खँ नं दु । थ्व खं जितः सालाकाल । अथे जुयाः थ्वहे बाखं ल्ययागु खः ।

‘जामन गुभाजु’ संकिपा व ‘जामन गुभाजु’ चरित्रयात छिं गुकथं थुइकाः दिया ले ?

दकले न्हापां ला ‘जामन गुभाजु’ धयाम्ह नेपालमण्डल दुनेयाम्ह छम्ह सिद्धहस्तम्ह मनूया रुपय् कया । तन्त्र विद्याय् निपुणम्ह गुभाजु जामनं गुभाजुं थःगु देसया न्हाय् तयेत विदेसं वःम्ह तान्त्रिकलिसे काइगु टक्कर नं च्वछायेबहःजू । तन्त्रमन्त्रया लू दक्वं ‘भि एफ एक्स’या माध्यमं क्यनेत्यनागु दु । थ्व ल्याखं थ्व तसकं हे हाथ्यां जाःगु ज्या खः धका धायेमाः । थथे च्यालेन्जिङ ज्या याये तसकं न्ह्यां ।

‘जामन गुभाजु’ संकिपायाबारे मेमेगु खँ नं कनादिसँ ले ?

थुके नेवाः फिल्म ख्यलय् नांजाःम्ह कलाकार सुशील राजोपाध्यायं ‘जामन गुभाजु’या मेन रोल म्हितादीगु दु । थ्व नेपालमण्डल (स्वनिगः) दुनेया बाखं खःसां थगुने तच्वकं ब्वःगु भुखाचं यानाः थनया ऐतिहासिक व सांस्कृतिक सम्पदा नष्ट जूबलय् उगु ईया स्वनिगःथें च्वंगु थाय् कथं चित्लाङयात ल्ययागु खः । थुकिया शुटिङ क्वचाये धुंकल । थौंकन्हय् सम्पादन व भिएफएक्स ज्या जुयाच्वंगु दु ।

‘जामन गुभाजु’ दयेके ज्या न्ह्याकेत गुलि थाकुल ले ?

तसकं हे थाकुल । पात्र ला ल्यया, तर ‘जामन गुभाजु’या बारे दुग्यंक खँ कनीपिं मालां माले हे थाकुल । शुटिङ यायेत पाय्छिगु थाय् ल्यये थाकुल । अनंलिपा भुखाय् ब्वयाः ज्या दित । वयांलिपा नाकाबन्दीया हुनिं ज्या दित । थुकथं दिपाः काकां बल्लतल्लं शुटिङ यायेफत ।

‘जामन गुभाजु’ गबले तकया दुने स्वये खनी ले ?

थुकिया ज्या धमाधम जुयाच्वंगु दु । भतिचा दुग्यंगु संकिपाया रुपय् हे पितहयेगु ग्वसाः जुयाच्वंगु दु । प्यला न्यालातिला अझ हे पी मालितिनि ।

न्ह्यब्वःम्ह ः  असंबरे