nepal life

“शक्तिशाली कम्युनिष्ट केन्द्र निर्माण यायेत पार्टी एकता” ः प्रचण्ड

नेवा: अनलाइन न्युज | २०७४ फाल्गुण १, मंगलबार १६:५१:१४

नेकपा माओवादी केन्द्रया नायः पुष्पकमल दाहाल प्रचण्डं शक्तिशाली कम्युनिष्ट केन्द्र निर्माण यायेगु आज्जुया लिसें नेकपा एमालेलिसे थःगु पार्टीं एकता प्रक्रिया न्ह्यःने यंकागु धयादीगु दु ।

तत्कालीन माओवादीं ‘जनयुद्ध’ न्ह्याकूगु दिंया लुमन्तिइ मंगलवाः पार्टी केन्द्रीय ज्याकुथि पेरिस डाँडाय् ग्वसाः ग्वःगु २३ क्वःगु जनयुद्ध दिवस समारोहयात सम्बोधन यानादिसें नायः प्रचण्डं बृहद् आज्जु पूवंकेगु नितिं एकता प्रक्रिया न्ह्यःने यंकागु धयादीगु खः ।

नायः प्रचण्डं धयादी, “सामान्य शक्तिया भरय् समाजवादी क्रान्ति सम्पन्न जुइमफइगु जूगुलिं तःधंगु शक्तिया आवश्यकता जूगु दु । उकिया हे नितिं झीपिं एमाले व माओवादी केन्द्र शक्तिशाली पार्टी निर्माणय् पलाः न्ह्याकागु खः ।”

संविधानय् समाजवाद च्वयाः व समाजवादया नारा थ्वयेकां जक समाजवादी क्रान्ति सम्पन्न जुइमफइगु टिप्पणी यासें नायः प्रचण्डं फुक्क प्रगतिशील, देशभक्त व वामपन्थी शक्तिदथुइ एकता व सहकार्य मदयेकं मगाःगु धयादीगु खः ।

देस व जनतायात केन्द्रय् तयाः राजनीतिक नेतृत्वं इलय् ब्यलय् जोखिम काये हे माः धासें नायः प्रचण्डं समाजवादी क्रान्तिया नितिं तकं थः व थःगु पार्टीं हाकनं जोखिम ल्ह्वनागु स्पष्ट यानादिल ।

लहड व सनकया भरय् क्रान्ति जुइमफइगु न्ह्यथनादिसें वय्कलं जनताया चाहना व राष्ट्रिय आवश्यकताया च्यूताः तयेत तकं आग्रह यानादिल ।

थौंकन्हय् हे एमालेलिसेया पार्र्टी एकता क्वचाइगु स्पष्ट यानादिसें आर्थिक समृद्धि व जनताया आर्थिकस्तर च्वन्ह्याकेगु नितिं नं छप्पं जुयाः वनेगु जनमत थःपिन्त प्राप्त जूगु दु धासें नायः प्रचण्डं नेपाःया राजनीतिक व सामाजिक हिउपालय् जनयुद्धया महत्वपूर्ण भूमिका दूगु खँ एमाले नायः केपी शर्मा ओली व एमाले नेतृत्वं नं स्वीकार याःगु दाबी यानादिल ।

समाजवादी अभियानयात सार्थक निष्कर्षय् थ्यंकेत अझ नं तःधंगु दायरा माःगु स्पष्ट यासें नायः प्रचण्डं थः व थःगु पार्टीं सहीद, बेपत्ता व घाःपाः जूपिं योद्धापिनिगु म्हगसविरुद्ध वनेगु कुतः तकं मयायेगु खँ कनादिल ।

शक्तिशाली कम्युनिष्ट केन्द्र दयेकाः थ्यंमथ्यं ३ करोड नेपाःमिपिन्त एकताबद्ध यानाः यंकेगु सोचय् थःपिं दूगु चर्चा यासें नायः प्रचण्डं वामपन्थी शक्ति एकताबद्ध मजुइमा धकाः चलखेल याइगु शक्ति परास्त जुयाः वनीगु व जनताया न्ह्यःने इमिगु छुं चलेमजुइगु खँ नं धयादिल ।

ज्याझ्वलय् माओवादी केन्द्रया सहायक संगठन वाइसिएलं थीथी झाँकी न्ह्यब्वःगु खः । जनयुद्ध दिवसया लसताय् माओवादी केन्द्रया नेता व कार्यकर्तां सिन्हः तिकाः कालबिल यासें भिंतुना कालबिल तकं याःगु खः ।

Categorized in राजनीति