nepal life

‘सेल्फी’ गबलेनिसें गुकथं ?

२०७४ आषाढ २, शुक्रबार १५:४३:०४

थौंकन्हय् इलय् ‘सेल्फी’ खँग्वः मन्यंपिं सायद दइ हे मखु जुइ । लिपांगु छुं दँनिसें विश्वन्यंकं ‘सेल्फी’या छ्यलाबुला अतिकं अप्वःगु खः ।

‘सेल्फी’ नांया खँग्वः आःया समाजय् लोकं ह्वानाच्वंगु दु । ‘सेल्फी’ खिचेयायेत सकसितं यःगु विषय जुयाच्वंगु दु । मचानिसें बृद्धतक ‘सेल्फी’या शौखिन जुइधुंकूगु दु ।

छितः नं ‘सेल्फी’ यःगु हे जुइमाः । तर छु छिं स्यूला ‘सेल्फी’या ट्रेन्ड गनं व गुकथं न्ह्यात ? यदि मस्यूसा सिइकादिसँ ।

‘सेल्फी’या इतिहास गथे खः ?

इतिहासय् न्हापांगु ‘सेल्फी’ सन् १८३९ स अमेरिकाया फोटोग्राफर रोबर्ट कोर्नेलियसं काःगु दाबी यानातःगु दु । वय्कलं थःगु किपाः थःम्हेस्यां हे खिचेयायेगु कुतः याःगु खः ।

अथेहे, सन् १८५० स न्हापांगु ‘सेल्फी’ काल धैगु नं धाःगु दु । तर ‘सेल्फी’ खँग्वःया छ्यलाबुला धाःसा अष्ट्रेलियाया छगू वेबसाइटं सन् २००२ या १३ सेप्टेम्बरय् अष्ट्रेलियायाछगू वेबसाइटं न्हापांगुखुसि ‘सेल्फी’ खँग्वःया छ्यलाबुला याःगु खः ।

खतरा नं दु ‘सेल्फी’या

झीसं यक्व हे न्यनागु दु कि ‘सेल्फी’या झ्वलय् आपालं मनूतय्गु ज्यान वन धैगु घटना । रुसया १७ दँया जीनियां ‘सेल्फी’या नितिं २८ फिट तःजाःगु तां (पुल)पाखें कुतुंवन व वया ज्यान वन ।

ओस्कर ओटेरो एगुइलर नांया छम्ह मनुखं फेसबुकय् थःगु छ्यनय् बन्दुक तयाः ‘सेल्फी’ कायेत्यंबलय् मुयाः ज्यान वन ।

अथेहे, १८ दँया मिसां ट्रेनया छतपाखें ‘सेल्फी’ कायेत्यंबलय् ज्यान हे गुमेयात ।

झीगु हे नेपालय् नं नारायणी खुसिइ ‘सेल्फी’ कायेगु झ्वलय् नम्रता सापकोटा बेपत्ता जुल ।