nepal life

‘राजमति’ संकिपाया मेकप आर्टिष्ट इन्द्र लामायात ग्वाहालि

नेवा: अनलाइन न्युज – ललेन्द्र शाक्य | २०७४ पौष २८, शुक्रबार ११:१८:१५

नेपालभाषाया छगू ज्वःमदूगु संकिपा ‘राजमति’या मेकप आर्टिष्ट इन्द्र लामायात आर्थिक ग्वाहालि यायेगु निंतिं विहिबार येँया बनस्थलिइ च्वंगु राजधानी ब्यांक्वेट एण्ड मल्टि भेन्यूइ छगु ज्याझ्वःजूगु दु ।

जलास्येँ (किड्नी) पथरी जुया तच्वकं उसाँय् मदुम्ह नांजाःम्ह मेकप आर्टिष्ट इन्द्र लामाया वासःयायेगु निंतिं आर्थिक ग्वाहालि यायेगु तातुनाः बिहिवाः जूगु च्यारिटेबल कल्चरल डान्स प्रोग्रामय् विशेष पाहाँ जुयाः झायादीम्ह महानायक राजेश हमालं इन्द्र लामायात नेपाल चलचित्र प्राविधिक संघ २०५६ पाखें मुंकूगु पीन्हय्द्व (४७ हजार) तकाया चेक लःल्हाःगु खः ।

स्वीदँ न्ह्यवःंनिसें मेकप आर्टिष्टया रुपय् ज्या यानाः वयाच्वनादीम्ह इन्द्र लामां मदनकृष्ण श्रेष्ठ व हरिवंश आचार्यया “सुर बेसुर” नांयागु टेलिसिरियलया नापनापं आपालं टेलिफिल्म व राजेश हमालं म्हितूगु “चट्याङ्ग”, नेवाः संकिपा “राजमति” थेंज्याःगु आपालं फिल्मय् मेकप आर्टिष्ट जुयाः ज्या यानादीगु दुसाः वयकलं नांजाःम्ह संकिपामि नीर शाहया “२५ वसन्त” निसें छम्ह मेकप आर्टिष्ट जुयाः ज्या न्ह्याकूगु खँ बिहिवाः जूगु ज्याझ्वलय् जानकारी ब्यूगु खः ।

उगु ज्याझ्वलय् नेपालभाषाया सांगितिक ख्यलय् नांजाःपिं म्येहालामि माणिक शाही व सरस्वति मानन्धरया नापनापं देवकुमारी खड्गी, राजेश शाही, लक्ष्मण चौलागांईपिन्सं म्ये हालाः न्यंकादीगु खः ।

अथेहेतुं इण्टरनेशनल पिस एकेडेमि सानो भ¥याङ्ग, लिटल स्टार मण्टेश्वरी स्कूल सामाखुशी, यशश्वी सेकेण्डरी स्कूल सितापाइला, लिटल बुद्ध मण्टेश्वरी स्कूल सामाखुशी, वात्सल्य इन्फाएण्ट स्कूल बुद्ध चोकया मस्तय्सं थीथी हुला प्याखँ न्ह्यब्वःगु खःसा ज्याझ्वलय् रोजमेरी रिसाल, सुष्मिता आचार्य व सुष्मिता भण्डारीपिन्सं हुलाप्याखँ न्ह्यब्वयादीगु खः ।

ज्याझ्वलय् न्यू एरा ब्याण्डंं विशेष प्रस्तुति न्ह्यब्वःगु खः । नांजाःम्ह हिरो सुमन सिंह मूपाहाँ कथं झायादीगु उगु ज्याझ्वलय् महानायक राजेश हमाल विशेष पाहाँ अले नांजाःम्ह नृत्य निर्देशक भुवन श्रेष्ठ व वरिष्ठ संकिपा पत्रकार विजयरत्न तुलाधर “असंबरे” व मेकप आर्टिष्ट इन्द्र लामाया जलास्येँया पथरीया सफल अप्रेशन यानादीम्ह डाक्टर गुणकुमार श्रेष्ठ पाहाँ कथं झायादीगु खःसा ग्वसाः खलःपाखें मूपाहाँ, विशेष पाहाँ, पाहाँपिं व ज्याझ्वः ताःलाकेत ग्वाहालि याःपिन्त मतिनाया चिं नं देछाःगु खःसा ज्याझ्वलय् ग्वसाःखलःपाखें कलाकार भिमसेन रिसालं लसकुस न्वचू व माला लामा रञ्जिकारं सुभाय् न्वचू बियादीगु खः ।

Categorized in कला