nepal life

‘ब्यालेन्स सापटी’ ! आः टेलिकमं नं न्ह्याकल

नेवा: अनलाइन न्युज | २०७४ माघ २२, सोमबार १३:०१:११

नेपाल टेलिकमं थःगु प्रिपेड ग्राहकया नितिं ब्यालेन्स फुइबलय् सापटी बिइगु ज्या न्ह्याकूगु दु । टेलिकमं थःगु १४ क्वःगु बार्षिकोत्सवया लसताय् ‘नमस्ते क्रेडिट सेवा’ नां बियाः थुज्वःगु सुविधा  हःगु खः ।

प्रिपेड कार्डबाहक ग्राहरकं आः फोन यायां हे ब्यालेन्स फूसां नं खँयात निरन्तरता बिइखनीगु जूगु दु । थ्वसिबें न्ह्यः नेपालय् संचालित मेगु टेलि कम्युनिकेशन कम्पनी एनसेलं जक सापटी बिइगु सेवा न्ह्याकाः वयाच्वंगु खः ।

एनसेलं न्ह्याकूगु  सापटी सेवा आःया युवा पुस्ता दथुइ अतिकं बय् बय् जुयाच्वंगु व युवा पुस्तां ययेकूगु दु । टेलिकमया प्रतिस्पर्धी कथं कयातःगु एनसेलं उगु सेवा न्ह्याकूगु ताःई तक टेलिकमं थुकी च्यूताः मक्यंगु खः । युवा पुस्तां थुज्वःगु सेवा अतिकं ययेकूगु खनेधुंकाः टेलिकमं नं उकिया अनुसरण यासें पैंचो कायेगु सेवा न्ह्याकूगु खः ।

सोमवाः टेलिकमं ग्वसाः ग्वःगु वार्षिकोत्सव ज्याझ्वलय् संचारमन्त्री मोहनबहादुर बस्नेतं सेवाया सुरुआत यानादीगु खः । उगु योजनाया पूर्ण कार्यान्वयन वइगु लच्छिया दुने क्वचाइगु जूगु दु । सोमवाः संस्थां थुकिया सफ्ट लञ्च याःगु खः । थुगु योजनाय् गुलि रकमया सीमा तयेगु धैगु विषय धाःसा क्वचायेके ल्यंदनि ।

अर्थात् ग्राहकं ब्यालेन्स फुइधुंकाः नं गुलि ईतक खँ ल्हायेखनीगु धैगु विषय पूर्ण कार्यान्वयनय् वयेन्ह्यः निर्धारण जुइगु जूगु खः । ग्राहकं बिना दां खँ ल्हायेखनीगु ई बराबरया रकम धाःसा लिपा रिचार्ज याइबलय् काटे याइगु जुइ ।

Categorized in बजाः