nepal life

‘बागदरबार धैगु अस्तित्वय् मदु, हरिभवन थुनेगु जुइ’ ः मेयर शाक्य

नेवा: अनलाइन न्युज | २०७४ कार्तिक १४, मंगलबार १७:२७:५७

येँ महानगरपालिकाया मेयर विद्यासुन्दर शाक्यं पुरातात्विक व ऐतिहासिक बागदरबार न्ह्यात्थे जूसां थुनेगु धयादीगु दु । मंगलवाः राष्ट्रिय सभागृहय् पत्रकार सम्मेलन यासें मेयर शाक्यं आः महानगरपालिका दूगु भवनयात बागदरबार धायेगु तथ्यप्रद मजूगु दाबी यानादिल ।

मेयर शाक्यं धयादी, “थुनेत्यनागु भवन बागदरबार हे मखु । थ्व १९९० साल लिपा जुद्धशमशेरया काय् हरि शमशेरं दयेकूगु खः । सच्छि दँ मथ्यंगु भवनयात ऐतिहासिक व पुरातात्विक धाइमखु । प्राचीन स्मारक संरक्षण ऐनं हे सच्छि दँ मथ्यंगु भवनयात पुरातात्विक माने याःगु मदु ।”

मेयर शाक्यं महानगरपालिकां आः अरिभवनयात थुनाः न्हूगु ज्याकुथि भवन दयेकेत डिजाइनया ज्या लिपांगु चरणय् थ्यंकागु जानकारी बियादिल ।

मेयर शाक्यं धयादी, “बागदरबार धैगु ठेगाना जक खः । अमर थापां दयेकूगु धाःगु बागदरबार आः अस्तित्वय् मदु । सिंहदरबारया मूल भाग बाहेकया क्षेत्रयात नं सिंहदरबार धाःगु थें बागदरबार नं ठेगाना जक हे खः ।”

वय्कलं पुरातत्व विभागलिसे नं थुगु विषयस थःपिन्सं सहलह यानाच्वनागु धयादिसें बागदरबार दुने राणाकालीन, मल्लकालीन व आधुनिक कालीन संरचनाया फ्यूजन यानाः न्हूगु भवन निर्माण यायेगु धयादिल ।

भुखाचं क्षति यायेधुंकाः थ्वसिबें न्ह्यः नं महानगरपालिकां बागदरबार पुनःनिर्माण यायेत प्रस्ताव याःगु खः । तर, पुरातत्व विभागं उकियात पुरातात्विक भवन धासें रेट्रोफिट यानाः संरक्षण यायेत निर्देशन ब्यूगु खः ।

वधुंकाः बागदरबार पुनःनिर्माणया योजना स्थगित जूगु खः । मेयर शाक्य येँ मनपाय् वयेधुंकाः उकियात थुनाः पुनःनिर्माण यायेत पलाः न्ह्याकूगु खः ।

वय्कलं बागदरबार धाःगु हरि भवनय् वि.सं. १९९० साल लिपाया तिथि न्ह्यथनातःगु अप्पा छ्यलातःगु लुयावःगु दाबी यानादिल ।

मेयर शाक्यं धयादी, “दहे मदूगु बागदरबार छु थुनेगु ? जिमिसं हरिभवन थुनाः न्हूगु भवन दयेकेगु जुइ ।”

वय्कलं उगु भवन थुनेगु विषयस अनावश्यक विवाद महयेत सकलसित आग्रह यानादिल ।

Categorized in स्थानिय-समाज